Kuupik: Oqaatsinut inatsit akisusariaqanngilaq

Akerliunerli oqaatsinut inatsisip sukaterneqarneranut sunniuteqarluarsinnaavoq eqqarsalersitsillunilu.

- Akerliusut oqaaseqaataat eqqarsaatigalugu, eqqarsartitsinerusut ilaat tassaapput, soorunami isumaqartoqaruni tunngaviusumik pisussaaffimmik kalluaasoqassasoq, taamaattoqassagaluarpat soorunami peerneqassapput. Ullumikkut suli naluarput taamaattoqarnersoq. Aammalu aappaattut, pisiassat akiinut qaffassaataasussatut nalilerneqarnera eqqarsaatigalugu, isumaqarpunga pisariaqartikkipput teknikkikkut ajornannginnerusumik, uuma allannguutissap piviusunngortinneqarsinnaanera eqqarsaatigissallugu. Naalakkersuisut siulittaasuat Kuupik Kleist, taama oqaropq.

Ussassaarinerit allagartalersuinerillu suliffeqarfiit namminersortut, pisortalluunniit pigisaat aamma allagaatit inatsisinit pisussaaffiliisut soorlu; aningaaserivinneersut, inatsisilerituuneersut pisortaneersulluunniit, inatsimmi allannguutaasussami kalaallisuinnaq allanneqartalernissaannut, aningaasartuutinik appartitsisinnaasumik, teknikkikkut qanoq aaqqiisoqarsinnaanersoq, Naalakkersuisut siulittaasuata erseqqissumik oqaaseqarfigerusunngilaa.

Sulisitsisut aamma atuisut peqatigiiffiinit oqaatsinut inatsisip suliffeqarfiit minnerusut aningaasartuutaannut aamma innuttaasut inuuniarnermut aningaasartuutaannut qaffatsitsisinnaanera piffissami kingullermi annilaanngatigineqarpoq.

Aamma partii Naalakkersuisuutitaqartoq Demokraatit, inatsisip allannguutissaa ataatsimut isigalugu akerliuffigalugu nassuerutiginikuuaat.

- Soorunalimi taamatut isumaqartoqarsinnaavoq, tunisassiortut imaluunniit pisiniarfiutillit namminneerlutik tamanna aalajangiiffigissagaat. Kisianni illuatungaani aamma eqqarsartariaaseq tunngaviusoq unaasoq, suna tamarmi nammineq niuernikkut aaqqikkumaarnera, tamanna uanga upperivallaanngilara. Uanga isumaqarpunga, tunngaviusumik tamanut atuutumik malittarisassaqartariaqartoq assigiinngittut eqqarsaatigalugit. IA-mi Naalakkersuisunilu siulittaasoq Kuupik Kleist, Demokraatit akerliunerannut taama oqarpoq.

Taamaattorli naqissuserpaa, inatsisip allannguutissai inissivillugit aalajangiunneqanngitsut aamma suli isumaqatiissutigineqarsinnaasut.

Siumumiillu oqaatsinut inatsisip taama sukaterneqarnissaa taama isikkoqartillugu tapersersorneqartoq oqaatigineqareerpoq. Siunnersuullu IA-p Demokraatit avaqqutiinnarlugit taasissutigiteriaannaavaa.

Oqaatsinut inatsimmi aallannguutissat maajip qulinganni suliareqqaarneqassapput, aatsaallu ukiaanerani ataatsimiinnermi akuersissutigineqassalluni.