Kuupik: Obama pilluarit
![](/sites/default/files/styles/image_934x467/public/article_images/obama_phone.jpg?itok=7BmLo77T)
Taasinerilli kiseqqissaarnissaat kinguaattoorallarpoq soorluttaaq 2000-mi taama pisoaqartoq George W. Bush taasinernik hundredenik arlaqanngitsunik unammillertiminut Al Gore-mut ajugaammat.
Taasinerit kiseqqisaarneqarnerat ullumi naammassissagunarpoq tamannali qinersinerup tamakkiisumik naammassineranut sunniuteqarnavianngilaq. Tassami Barack Obama ukiuni sisamani tulliuttuni USAmi præsidentiussaaq.
Maanna nunat assigiinngitsut siuttui pilluaqquseqattaarput.
Kinap præsidentia Hu Jintrao Obamamut pilluaqqusereersimavoq. Taamatuttaaq Ruslandip præsidentia inuulluaqqusisimavoq.
- Obamap allattoqarfiata qanimut suleqatiginera ingerlatiinnassavarput, Ruslandip præsidentia Sergej Lavrov oqarpoq.
Tuluit Nunaanni ministeriuneq David Cameron aamma Twitter atorlugu pilluaqqussivoq.
- Ikinngutiga Barack Obama pilluaqqungaarpara. Suleqatigiilluarnissamut qilanaaraarpugut, allappoq.
Frankrigip præsidentia Francois Hollande aamma pilluaqqusinermini oqarpoq Obamap ajugaanera USAmut nunarsuullu sinneranut pingaaruteqarluinnartoq.
Nunatsinniissaaq Obamap qinigaaqqinnera nuannaarutigineqarpoq.
- USAp issittumut soqutiginninnera Obamap præsidentiunerani malunnarsimavoq, Naalakkersuisut siulittaasuat Kuupik Kleist Obamamut aamma pilluaqqusissamaartoq oqarpoq.