Kuupik: Naammassisaqarfiunerusariaqarput naalleraatsitsisoqaranilu
Akileraartarneq Atugarissaarnerlu pillugit isumaliutissiissutit piviusunngortikkiartuaarnissaat siunertaralugu Naalakkersuisut nutaamik immikkoortortaqarfiliorput, taamaattumillu Namminersorlutik Oqartussat naammassisaqarfiussapput, naalakkersuisoqarfiillu imminnut naalleraatinnginnerunissaat anguniarneqartariaqarluni.
- Immikkoortortaqarfittaaq pillugu Suliassaq inassuteqaatillu piviusunngortinniarlugit aaqqissuussinissaq pisariaqarpoq, Naalakkersuisut siulittaasuat Kuupik Kleist oqarpoq.
Qulequttat assigiinngitsut arfineq marluk naapertorlugit, aaqqissuusseqqinnissaq ilusilersorneqarpoq.
Immikkoortoqarfiup naalakkersuisoqarfiit assigiinngitsut, pingasut suliaat ataqatigiissaassavai.
Qulequttat arfineq marluusut ukuupput:
- Meeqqanut inuusuttunut tunngasut immikkut sammineqarneri.
- Ilinniartitaaneq
- Inuusutissarsiornikkut suliffeqarnikkullu pissutsit.
- Utoqqaat atugaannut tunngasut
- Sanaartornermut tunngasut.
- Pisortat suliffeqarfiisa nutarsarnissaat.
- Akileraartarnerup, ineqarnerup isumaginninnerullu iluani iluarsaaseqqinnerit.
Naalakkersuisunit naqissuserneqarpoq, naalakkersuisoqarfimmik nutaamik pilersitsisoqassanngitsoq.
Nutarsaanerlu aningaasatigut sipaarniarnermik pissuteqartoq, Kuupik Kleistimit oqaatigineqarpoq.
- Naluneqanngilaq, ukiuni kingullerni allaffissornikkut sipaaruteqartoqarnera annertuumik piumasaqaataasoq. Taannali kisimi pissutaanngilaq, siunertarivarput naalakkersuisoqarfiit apeqqutaatikkunnaarlugit, naalakkersuisoqarfiit akimorlugit suliassat suliarisalernissaat, Naalakkersuisut siulittaasuat Kuupik Kleist oqarpoq.