Kuupik meerartaarnermut atatillugu sulinngiffeqartussanngortoq, Sermitsiap ullumi allaaseraa.
Folketingimilu taartissaa tassaassagunarpoq 45-nik ukiulik, Sofie Rossen.
Kuupik Kleistip, Inuit ataqatigiit tunuliaqutaralugu Folketingimi ilaasortaasup, meerartaarnermut atatillugu Folketingimi ilaasortaanermini sulinngiffeqarnissaa apriilimiit juunip tungaanut pissaaq.
Georg Olsen 246-nik taasiseqarmat siullertut sinniisussarigaluarpaa, taannali Aasiaat kommuneani kulturikkut suliniutinut ukiortaamiit pisortanngortinneqarpoq, taamaattumillu Folketingimut isinnginnissani kissaatigisimallugu.
Sinniisussap aappaaa tassaavoq Aviâja Vandersee, taanna 145-nik qinersiseqarpoq, taannaavorlu aamma Kuupik Kleistip meerartaarfigisassaa, taamaattumillu aamma meerartaarnermut atatillugu sulinngiffeqartussaavoq.
Pingajuattut sinniisussaasoq tassaavoq Sofie Rossen, taanna 92-inik qinersiseqarpoq, taannalu Kuupiup sulinngiffeqarnerani taartaasussanngorpoq.
- Taartaasussanngorninnik oqaasiinnartigut kalerrinneqarpunga, pisariaqartinneqarumalu taartaanissara ajorinngilluinnarpara, 45-nik ukiulik, Sofie Rossen, Tele Greenlandimi allattaanerusoq, Sermitsiamut oqarpoq.