Kuupik Kleistip saqqummiussinera soqutigineqarluarpoq
Kunngeqarfiup Danmarkip Issittoq pillugu iliuusissaa 2011-mit 2020-mut atuuttussaq, Københavnimi aggustip 22-anni saqqummiunneqarpoq. Tamanna pivoq Danmarkip, Savalimmiut aamma Nunatta akornanni ukiup ataatsip ingerlanerani oqaluuserineqareersorlu.
Saqqummiussineq peqataasunit naammagisimaarneqarpoq.Tusarnaarianut ilaavoq siunnersuisarfimmi Orbiconimi ingeniøritut sulisoq, Inooraq Brandt.
- Ataavartumik atuineq aamma pinngortitamut avatangiisinullu tunngasunik maani issittumi sammisaqarniarneq uagut tugitsinniit nuannaarutigaarput, Inooraq Brandt oqarpoq.
Tusarnaariarninni pissarsiaqarpit?
- Iluarpoq periusissap toqqaannartumik saqqummiunneqarnera tusarlugu. Aggerpugut alapernaalluta. Periusissaq saqqummiunneqaqqaarmat misissorlugu atuarparput, tassanilu suut uagutsinnut attuumassuteqarnersut oqaluuseralutigit, Inooraq Brandt oqarpoq.
Kommuneqarfik Sermersuumi pitsaaliuinermik sulialik, Nikku Olsen tusarnaariartunut aamma ilaavoq. Taassuma apeqqutigaa, nunarsuatta kissakkiartornera ilutigalugu umiarsuarsuit takornariartaatit angallannerulernerat avanersuarmi inuit piniartuunerannut ulorianartorsiortitsinissaat pinaveersaarniarlugu qanoq iliuuseqartoqartariaqartoq, taakku nuutsitaaqqinnginnissaat anguniarlugu.
Akissummik atorsinnaasannik akineqarpit?
- Aap, akissuteqarnera pissarsiaqarfigaara. Akissummi tusaasinnaasoraara, Avanersuarmi inuit silap pissusaanik peqquteqartumik ajornartiorsiortinneqartut inuunerisa allanngunnginnissaannik suliniuteqartut. Tamannami psariaqarpoq piniartut pisinnaatitaaffiisa annaannginnissaat angussagaanni, Nikku Olsen oqarpoq.
Nuna Oilip pisortaa, Hans Kristian Olsen saqqummiussinermut tusarnaariartunut ilaavoq. Taassuma Naalakkersuisut siulittaasuat paasiniaavigaa, aatsitassanik aamma uuliamik misissuisoqarfimmik Nunatta namminerisamik oqartussaaffianik pilersitsinissaq siunniunneqassanersoq. Naalakkersuisut siulittaasuata akissutigaa, suli Nunatsinni ilinniarluarsimasunik amerlanernik amigaateqarnerput eqqarsaatigalugu, taamatut aallartitsisoqassappat nunat allat suleqatigineqartariaqartut.
Akissut taamaattoq naammagiviuk?
- Aningaasanik aammalu aatsitassarsiornermik, ujarassiuunik uuliasiornermillu paasisimasaqarluartunik ilinniarluarsimasunillu amigaateqarnerput, taamatut aallartitsisoqarnissaanik nangaanera paasissinnaalluarpara, Hans Christian Olsen oqarpoq.
