Kuupik Kleistip qillerineq isumannaatsuunerarpaa

- Uuliamik ujaasilluni qillerinerit paasisaqarfigilluarpavut, taama oqarpoq Naalakkersuisut siulittaasuat, aatsitassanut naalakkersuisoq Ove Karl Berthelsen peqatigalugu, Cairn Energyp umiarsuaanut qillerummut Stena Forthimut, massakkut Qeqertarsuup Diskop kitaani misileraalluni qillerisumut, sisamanngormat paasisassarsioreerlutik.

Politikerit taakku marluk uuliamik ujaasilluni qillerineq Stena Forthimi paasisaqarfigaat. Tamatuma saniatigut isumannaallisaanermut tunngasunik paasissutissinneqarput.

- Qillerussuit atorneqartut taama ittut nunarsuarmi atorneqartartut nutaaliaanerpaat ilagigaat paasivarput, suninnguillu tamarmik sillimaniarnermut periaatsit pitsaanerpaat najoqqutaralugit ingerlanneqarlutik. Aamma sillimaniarnermut tunngassuteqartut sulisut ulluinnarni sulinerannut ilaalluinnarnerat takullugulu paasivarput, Kuupik Kleist taama oqaluttuarpoq.