Kuupik Kleistip kujataa angallaviginialerpaa
Kummune Kujallermi borgmesterip Simon Simonsenip, upernaariaq tamaat atorpaa, Naalakkersuisunut uparuartuilluni, taakku kujataani pissutsinut soqutigisaqarpasinnginnerarlugit. Simon Simonsenip aamma eqqartorpaa Kujataata aningaasarliornera. Tamakkulu pissutigigunarlugit Naalakkersuisut Kujataanut maanna angalanissartik pilersaarutigaat.
- Tusaavagut qanoq oqariartornersut, kisianni aamma nalunngilarput kujataani pissutsit qanoq ineriartorsimanerat, nalunatigulu ukiuni kingullerni suliffissaqarnikkut aningaasarsiornikkut kinguariartorsimaneq ilisimallutigu, tamakkulu pissutigalugit kujataanut angalassuungut, Kuupik Kleist oqarpoq.
Kommune Kujallermi borgmesterip upernaariaq Naalakkersuisunut kissaatigaa, kujataani pissutsit ilungersunartut, soorlu suliffissaaleqineq annertuseriarsimasoq, tamatumalu kinguneranik akileraarutitigut isertitat appariarnerannik aaqqiisoqartariaqartoq.
Aaqqiissutissanik nassarlusi angalaniarpisi?
- Nunap immikkoortuini pilersaarusiornermut atasumik angalanissarput isigineqassaaq, kommunini nunallu immikkoortuini politikerit inuussutissarsiornermillu ingerlatsisut oqaloqatiginissaat siunertaraarput. Taamaaliornitsigut pilersaarutinik nutaanik aallartitatsinnik oqaloqatigiissuteqassalluta, aammalu kujataani aningaasarsiornikkut pilersaarutit tusarusukkatsigit, Kuupik Kleist oqarpoq.
Naalakkersuisut siulittaasuata oqaatigaa, nunatsinni pissutsit allanngoriartornerisa kinguneranik pilersaarusiornernik nutaanik aallartitsisoqartariaqartoq. Assersuutitut taavaa silap kissakkiartornera ilutigalugu aalisarnikkut periarfissat allanngornerat.
- Naggorissaanikkut uumasuuteqarnikkullu inuussutissarsiornerit pitsanngoriartortut takusinnaavagut. Tamakkulu ataatsimut isiginiartussaavagut, kissaatigaarpullu aaqqiiniaqataanissarput, illuatungeriilluni pisuuteqattaarnermut taarsiullugu, Naalakkersuisut siulittaasuat taama oqarpoq.
Angalaneq pissaaq maaji naalerpat, Inatsisartuni ataatsimiinneq naammassereerpat aammalu Kanukoka Ilulissani ataatsimeersuareerpat.
