Kuupik Kleistip Jonathan Motzfeldt taarsissavaa

Nunat Avannarliit Killiit siunnersuisoqatigiivisa ukiumoortumik ataatsimiinnerat Jonathan Motzfeldtip peqataaffigisinnaanngilaa. Kalaallit Nunaannit peqataasussat aqagu aallassapput.

Jonathan Motzfeldt taarserlugu Kuupik Kleist Kalaallit Nunaanniit aallartitatut ataatsimeeqataassaaq.

Ataatsimiinneq Savalimmiuni Tórshavnimi ingerlanneqassaaq, oqaluuserineqartussanullu ilaapput takornariaqarneq, avatangiisit aamma silaannaap allanngoriartornera. Silaannaap allanngoriartornerata Nunanut Atlantikup avannaaniittunut Nunanilu Avannarlerni Killerniittunut kingunerisinnaasai ulloq ataaseq atorlugu eqqartorneqassapput.

Kalaallit Nunaata Savalimmiullu saniatigut Nunat Avannarliit Killiit siunnersuisoqatigiivinut Island aamma ilaasortaavoq. Siulittaasuuffik Savalimmiut massakkut tigummivaat, pilersaarutaavorlu Kalaallit Nunaat aappaagu siulittaasunngussasoq.

Jonathan Motzfeldtili, perululluni napparsimaqqamersoq, peqqissillunili nunatsinnut maanna angerlaqqammersoq, siulittaasup inaanut pilersaarutaasutut inississanersoq suli nalunarallarpoq.