Kuupik Kleistip Jan Øberg illua'tungilerpaa

Allattoq Mads Lynge
maajip 11-at 2005 05:27

Eqqisseqatigiinnissamut aaqqiagiinnginnernullu ilisimatusartup danskiusup Jan Øbergip Igalikumi isumaqatigiissut nunatsinnukarluni uparuartuiartornera Folketingimi inatsisartunilu ilaasortap IA-meersup Kuupik Kleistip eqqumiiginanngitsoornerarpaa.

Ilisimatusarfimmilu isumaqatigiissutip oqallisigineqarnera ajunngikkaluarluni kisiannertaqartoq Kuupik Kleist isumaqarpoq:

- Oqallinnissaq ajunngilaq, kisianni una uanga amigaatigineqarluinnartutut isigaara: Nammineq akisussaaffimmik qimarratiginninneq aammalu pisuusaarluni Kalaallit Nunaanukarsinnarluni taava inuiaqatigiit kalaallit taamatut appisaluullugit uagut eqqisseqatigiinnissamik soqutigisaqanngitsugut, immitsinnuinnarlu uagutsinnut ujartuisugut, naak nalunngilluinnaqqissaaraluarlugu ukiut 50-it sinnerlugit atugarliutigisimagipput qallunaat taamatut isumaqatigiissuteqarsimanerat, aatsaallu siullerpaamik uagut peqataaffigisatsinnik pitsaanerungaatsiartorsuarmik isumaqatigiissuteqarluta, Kuupik Kleist oqarpoq.

Kuupik Kleist aamma isumaqarpoq Jan Øberg akisussaassuseqarusukkuni nunamini isumaqatigiinniarnerillu ingerlanerini oqallitsitsisimasariaqaraluartoq. Igalikumi isumaqatigiissut siorna atsiorneqarpoq, USA-llu pituffik imminut illersorniarnissaminut atorsinnaagaa ilanngullugu isumaqatigiissutaalluni.