Kuupik Kleist ukiortaami siullerpaamik oqalugiarpoq
- Kommunit 2009-mi sisamaannanngortinneqarmata nunaqarfinnilu aqutsisoqarfiit ataatsimoortinneqalermata ukioq 2009 eqqaamaneqaatissaqarluarpoq, soorluttaaq Nunatsinni namminersorneq atuulersinneqarlunilu politikkikkut nikittoqartoq, Kuupik Kleist oqarpoq.
Silap pissusaa pillugu Københavnimi ataatsimeersuarnermi anguneqarsimasut pillugit Naalakkersuisut siulittaasuata nuannaarutigai. CO2-mik aniatitsinerup annikillisarneqarnissaa erngullu nukinganik nukissiuutiliornissat aningaasanik attartornikkut pilersaarusiorneqarnissaat sulissutigineqassasoq, Kuupik Kleist ilaatigut oqarpoq.
Nungusaataanngitsumik piniarneq aalisarnerlu naleqqussaanissaat aaqqissuussiffigineqarnissaallu naalakkersuisut siunnertaraat.
- IWC-mi Nunarput ilaasortaaginnassanersoq ukiormanna aalajangiiffigineqassaaq.
Aatsitassaqarnermut tunngatillugu oqartussaaffik Kalaallit Nunaannit akisussaaffigineqarlermat tamanna nuannaarutissaavoq. Aatsitassarsiulernissallu qilanaarnarlutik, Kuupik Kleist oqarpoq nangillunilu.
Oqaluffeqarnikkut akisussaaffiup tiguneqarnissaa alloriarfigineqassaaq, aamma kommunit aaqqissuuteqqinneqarnissaat piffissaliussamik pilersaarusiortoqarnissaq pingaaruteqarpoq.
Kommunit inissialiortitsinermut akisussaaffeqalernissaat naalakkersuisut pingaartippaat, akisussaaffik kommuninut nuunneqarpat Naalakkersuisut nuna tamakkerlugu suliassanut aallussisinnaalerniassammata, Kuupik Kleist oqarpoq, Ulf Fleischerillu erinarsuusiaa "Isiaannarusunngilanga" naggataatigut issuaaffigalugu.
Kuupik Kleistip oqalugiaataa atuarneqarsinnaavoq.
