- Søren Espersen ilumuunngilaq oqarami uuliasiornermi isertinneqarsinnaasutut ilimagineqartut nunatsinnut tamakkiisumik tuttalissasut, tassami ilumoortoq tassaavoq Danmark aningaasanik isaatitseqataasussaammat ukiorpassuarni siullerni, nunatta folketingimi ilaasortortaatitaasa aappaat Kuupik Kleist, Inuit Ataqatigiinneersoq, aviisimut ullormut saqqummersartumi Børsenimi allaaserisaq tunngavigalugu taama oqarpoq.
Nunatta namminersulernissaanut Dansk Folkeparti-p akerliliiumalluni kingumut oqariartuuteqareersorlu, Kuupik Kleistip Søren Espersen akissuteqarfigaa.
- Ingattarserneruvoq Danmarkip aningaasaliissutaasa ikiliartortinneqarnerisa saniatigut, sinneqartoorutinik pissarsisalernissamik piumasaqarneq, pingaartumik ilisimagaanni uuliasioqatigiiffissuit aningaasartuutitik matussuseqqaassagaat, Kuupik Kleist allappoq, nangillunilu:
- Aamma eqqaamaneqartariaqarpoq pingaartumik imaani uuliasiorneq aarlerinartorpassuarnik nassataqartartoq, uagullu imaani uumassusilinnik inuuniuteqartuusugut kisitta tamatumani ulorianartorsiortinneqartussaassuugut – Danmarki danskillu pinnatik, Kuupik Kleist oqarpoq.
