Kuupik Kleist sulisartunut: Suliffissanik pilersitsinissaq pingaartipparput
Suliffissaaleqinermilli eqqugaasut amerlanerat amerlasuut misigisimagaat nassuerutigaa, suliffissaaleqinerli annikillisinniarlugu suliffissat nutaat pilersinneqarnissaat Naalakkersuisut politikkerigaat erseqqissaatigaa.
Sulinermik inuutissarsiuteqartut kattuffii assigiinngitsut pingasoqiusaasumik isumaqatigiinniarnernik taaneqartartunik peqatiserigamikkik aamma nuannaarutiginerarpaa.
Tamatta akisussaaqataanitsinnik Sulinermik Inuutissarsiuteqartut Kattuffianni siulittaasup, Jess G. Berthelsenip, ullaaq Radioaviisimi oqaasii maluginiarsimavai, sulisartullu tamaasa Kuupik Kleistip kaammattorpai ukiuni makkunani aalajangiisuusuni kivitseqataaniaqqullugit.
Aamma erseqqissaatigaa maani nunami inuussutissarsiornermut suliassat angisoorsuit piviusunngortinniarneqarneranni SIK Sulisitsisullu ataatsimik nipilimmik arlaleriarlutik nalunaaruteqartarmata, "inooqataanermi appasinnerusutut inissisimatitsinissaq" illersorsinnaanagu, tamannalu Naalakkersuisut nuannaarutigigaat.
Tamanna Naalakkersuisut isumaannut naapertuulluinnartoq Kuupik Kleistip erseqqissaatigaa, SIK-lu immikkut qutsavigaa nunarsuaq tamakkerlugulusooq sulisartoqarnerup iluani sapiiserluni aqqutissiuussimmat.
Kuupik Kleistillu oqaaseqaataa Jess G. Berthelsenip ualigaa akissuteqarfigaa:
- Avataaneersunik akilernerluinerup maani nunatsinni sukkulluunniit eqqunneqannginnissaanik Kuupik Kleistip SIK-mut tapersiinera naammagisimaaqaarput, Jess G. Berthelsen allappoq.
- Anguniakkap anguniarnera sivisullunilu pikkunarsimaqaaq, taamaattorli akiuunnerup killiffiata qularnarunnaarsippaa, ileqqorissaarnikkut inuiaqatigiinnullu allanut ataqqinninneq eqqortuusoq, SIK-p siulittaasua allappoq.
