Kuupik Kleist: Suliffeqarfissuarnik piginnittuuneq oqallisigitigu

Suliffeqarfiissuit namminersorlutik Oqartussanit pigineqartut amerlanerusut namminersortunngortinneqassasut Naalakkersuisut siulittaasuat, Kuupik Kleist, isumaqarpoq. Tusagassiortunit katersortitsinermi ullumi tamanna erserpoq. Kisianni inuiaqatigiinni siullermik oqallinnissaq kaammattuutigaa. Suliffeqarfiit sorliit namminersortunngortinneqassanersut, taamaassappallu qaqugu tamanna pissanersoq oqarumanngilaq. Kisianni Nukissiorfiit namminersortungussanngitsut Kuupik Kleist oqarpoq.
Allattoq Jens Thorin
septembarip 22-at 2009 13:21

Kisianni inuiaqatigiit sukumiisunik tunngavissaqarluartumillu maanna oqallittariaqartut Kuupik Kleist isumaqarpoq.

- Pisortat suliffeqarfippassuarnik tamakkiisumik ilaannakortumilluunniit piginnittuunerat oqallisigineqartariaqalerpoq. Nutaamik isummernissamut tungavissarsiortariaqarpugut, Kuupik Kleist oqarpoq.

- Assersuutigalugu suliffeqarfiit, aningaasarsioriaatsit nalinginnaasut toqqammavigalugit tunisassiortunut allanut unammillerlutik tunisassiaminnik tuniniaasut, pisortat ingerlattariaqagaattut isigingilakka, naalakkersuisut siulittaasuat nangippoq.

Kisianni sulifffeqarfiit suut namminersortunut tunineqassanersut taassuma massakkut taagorumanngilai.

- Piginneqatigiiffiit Namminersorlutik Oqartussanit toqqaannartumik pigineqartut 20-nit amerlanerupput, aammalu piginneqatigiiffiit 70-it palillugit piginneqataaffigalutigik, Kuupik Kleist oqarpoq.

Kisianni ingerlatseqatigiiffiit assigiinngitsut marluk inuiaqatigiinnit pigineqarlutik ingerlanneqarnissaat Kuupik Kleistip pissusissamisoortuutut isigaa.

- Suliffeqarfiit pilersuinermik aallutallit, soorlu Tele oqarasuarsinnaanermik pilersuiviusoq, KNI, nioqqutissanik pilersuiviusoq, kiisalu Nukissiorfiit ilaatigut innaallagiamik pilersuisoq, nalinginnaasumik pisortanit nalinginnaasumik ingerlanneqarnissaat pissusissamisoorpoq, Kuupik Kleist oqarpoq.

Ingerlastsiseqatigiiffiit aamma allat pisortanit pigineqartariaqartutut isigisai tassaapput NunaOilitut ittut.

- Takorluunngilara NunaOil, maanna tamakkiisumik pigilernikuusarput, pisortanit iperarneqassasoq. Nunatsinni aatsitassarsiornerup uuliasiornerullu aallartisarneqarnerani, piginneqatigiifik NunaOilitut ittoq pisariaqartinneqartussaammat, taannalu pisortanit pigineqarpat silatusaarnerussaaq, Naalakkersuisut siulittaasuat, Kuupik Kleist oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq