Kuupik Kleist: Suliassaq imaannaanngitsuuvoq
Herstedvesterip parnaarussiviani parnaarussat tissaarluersaatinik nakorsaatitortartut oqarput, pinngitsaalineqarlutik katsorsartittarlutik. Nakorsaatip kingunerluutigisinnaasai pillugit saniatigut paasissutissinneqarneq ajorput.
Tamanna nalunaarusiami, Europarådip naalliutsisarnerup akiorniarneranut komitéata 2008-mi Danmarkimut tikeraarnerata kingorna, qanittukkut saqqummiunneqarpoq.
Kalaallinut parnaarussanut nakorsaatit tissaarluersaatit pillugit paasissutissat pillugit Aleqa Hammond Siumumeersoq suliassap qanoq pineqarnissaa pillugu Naalakkersuisunut apeqqutissaqalerpoq.
Naalakkersuisullu siulittaasuat, Kuupik Kleist, ullumikkorpiaq akissuteqarpoq, oqarlunilu, suliassaq imaannaanngitsutut isigalugu:
- Kalaallit Nunaanni nutaamik parnaarussiviliornissaq pineqaatissinneqarsimasunut taakkununnga immikkut najugarineqartussaq Naalakkersuisut assorsuaq pingaartippaat. Naalakkersuisut tassunga atatillugu Danmarkimi oqartussaasut inatsisinik atortitsinermut akisussaasut ingerlaavartumik oqaloqatigissavaat, kalaallit pineqaatissinneqarsimasut qallunaanut pineqaatissinneqarsimasutulli katsorsarneqarnissaat qulakkeerniarlugu, Kuupik Kleist oqarpoq.
Danmarkimi inatsisinik atortitsinermut ministeri Lars Barfoed aggustimi Kalaallit Nunaaliassaaq, tamatumanilu Kuupik Kleistip parnaarussivissaq pillugu ministeri oqaloqatigissallugu.
