Kuupik Kleist: Siunnersuut amigaaterpassuaqarpoq

Naalakkersuisooqatigiinnut illuatungiliuttut Inuit Ataqatigiit siulittaasuat Kuupik Kleist isumaqarpoq Aningaasanut Inatsisissatut siunnersuut amigaaterpassuaqartoq.

Naalakkersuisut oqarput 100 million koruunit amigaataasut, aningaasalli amigaataasut oqaatigineqartumit amerlanerungaarsinnaasut, Kuupik Kleist oqarpoq.

- IA-mit isumaqarpugut nalunarluinnartoq naalakkersuisut 100 mio. koruuninik amigaateqarnersut, imaluunniit amigaatigineqartut 200-300 millioniunersut imaluunniit 0 koruuniunersut.

Kuupik Kleist isumaqarpoq ukiut siuliini aningaasanut inatsisissap suliarineqartarnerani periuserineqarsimasut aamma ilusilersuineq assilineqarsimasut.

- Kkisianni kisitsisit allanngortiterneqarsimapput nalorninartorparssuaqarlutillu. Suliaq naammassineqanngitsoq inatsisartunut saqqummiunneqarpoq, ilaatigut 100 millioni koruunit eqqartorneqarlutik. Kisianni kisitsit allarluinnaasinnaavoq, IA-p siulittaasua oqarpoq.

Aningaasaqarnermut ataatsimiititaliaq aamma naalakkersuisunut arlalippassuarnik apeqquteqaasimavoq akineqartariaqartunik.

-Naalakkersuisut isummerfiginngisaat aamma arlalippassuupput. Neriorsuutit, soorlu angallannikkut aningaasaleeqqittariaqarnerit immaqalu alumiumik Alcoap aatsitsiviliornissaanut tunngasut. Nunatsinni sulilersinneqassappata, inuiaqatigiit kalaallit qanoq aningaasartuuteqassappat sunullu. Aamma SAS-ip Air Greenlandimi piginneqataassutai tuniniakkat massakkut pisisarineqassappata qanoq akeqassappat. Allarpassuillu isummerfigisariaqarput, nangippoq.

Siunnersuusiaq isummerfigiuminaatsupilussuususut IA-p aamma isumaqarfigaa naammassillugu suliaanngimmat. Siunnerfinnik erseqqissunik aamma tikkuussiffiunani.

- Massakkorpiaq oqarsinnaanngilanga aningaasat uku ukualu uanngaanniit aaneqartariaqassapput, pissutigalugu nalugatsigu aningaasat ujartugassat qanoq amerlatiginersut aammalu sunut atorneqassanersut.

Kuupik Kleist oqarpoq.

Itisiliineq inatsisartut ataatsimiilerneranni politikerit pingaartitaannik ujartuiffiusoq KNR-ip nittartagaani knr.gl-imi tusarnaarneqarsinnaavoq.