IA Siumumut “ajaappissatut” inissisimarusukkunnaarpoq. Partiip siulittaasortaava Kuupik Kleist AG-mut ullumikkut taama oqarpoq.
- Suleqatigiinnneq qinersiviup naanissaata tungaanut ingerlanneqarsinnaasoq qularnaarsinnaagutsigu Siumut naalakkersuisuni aatsaat suleqatigilissavarput. Demokraatit imaluunniit Atassut aamma suleqatigisinnaavavut. Suleqatigiinnerli ingerlaannarsinnaasariaqarpoq, Kuupik Kleist oqarpoq.
- Ukiuni kingullerni naalakkersuisuni suleqatigiinneq sorsuffittut isikkoqarneruvoq, politikikkut sulinerup iluani minnerunngitsumillu innuttaasut eqqarsaatigalugit “katsorsarneqartariaqartunik”. Politiki ullormiit ullormut ingerlanneqartoq innuttaasut naammagiinnarsinnaanngilaat. Tamanna politikerinik nuannarisaqarunnaarnermik kinguneqarpoq, Kuupik Kleist oqarpoq.
- Taamaattumik patajaatsuuneq pilerseqqittariaqarparput, eqqarsarlutalu uninngatsiarnitsigut taamaaliorsinnaavugut, qanoq iliuuseqarnissaq atuussinnaasoq pilersaarusiorlugu.
Taamaattumik Kuupik Klesitip partiimi ammasumik oqallinnissaq ammaffigaa.
Siulittaasup akerlilernissaanik kikkut tamarmik ersissuteqassanngitsut oqaatigineqareerpoq.
- Isummat akerlilerneqaraangata nutaanik saqqummersoqartarpoq, tamannalu ingerlattariaqarparput Kuupik Kleist oqarpoq.
