Kuupik Kleist: Sakkutuuliineruneq upalungaarsimaniarnermut iluaqutaassaaq

Illersornissamut folketingimi isumaqatigissutip nutaap Kalaallit Nunaannit akuersaarneqarnissaanut Kangilinnguani Sakkutooqarfimmi pisortaasimasup Axel Fiedlerip mianersoqqussutigaa, tamanut tunngasuni danskit nunami eqqissisimanaraluaqisumi sorsunnissamut sioorasaarisutut isikkoqarsinnaanerat oqaatigalugu.

Taamaattorli annertunerusumik sakkutuulersuisoqarnissaanut Kuupik Kleist tunuarsimaanngilaq:

- Immap angallavigineqarnerulersussatut takorloorneqartup nakkutigineqarnera annertusisarniarneqarnersoq matumani apeqqutaalluinnarpoq, nunatta imartaani angallatit angisuut soorlu takornariartaatit aammalu assartuussuit angallannerannut nakkutilliinerup annertusarneqarnissaa siunertarineqarnersoq, imaluunniit sakkutooqarnikkulluunniit suliat nunanut allanut sammitinneqartuunersut, Kuupik Kleist oqarpoq, nangillunilu:

- Kisianni paasisakka naapertorlugit illersornissaq pillugu folketingimi isumaqatigiissut marlunnik siunertaqarpoq: Sipaarniartoqassasoq, aamma Nunatsinni, illuatungaanilu killeqarfitta imartattalu nakkutigineqarnera annertusarneqassasoq, Kuupik Kleist Radioaviisimut oqarpoq.

Naalakkersuisut siulittaasuat Kuupik Kleist Danmarkillu illersornissamut minsteriat Søren Gade aggustimi septembarimiluunniit ataatsimeeqatigiissapput.