Kuupik Kleist: Pisortat suliffeqarfinnik piginittuunerat oqallisigineqartariaqalerpoq

Suliffeqarfiit Namminersorlutik Oqartussanit pigineqartut, nalinginnaasumik aningaasarsioriaatsit toqqammavigalugit tunisassiortut, namminersortunut tunineqarnissaat eqqarsaatigineqartariaqalersoq, Naalakkersuisut siulittasuata, Kuupik Kleistip tusagassiortunik ippassaq katersortitsinermini oqaatigaa.
Allattoq Jens Thorin
septembarip 23-at 2009 07:04

Taassuma suliffeqarfiit tunisassiortut sorliit namminersortunut tunineqassanersut aamma qaqugu tamanna pissanersoq maanna oqaatigiumanngilaa, oqaatigereerluguli, Nukissiorfiit namminersortunut tunineqassanngitsut.

Kisianni inuiaqatigiit sukumiisunik tunngavissaqarluartumillu maanna oqallittariaqartut Kuupik Kleist isumaqarpoq.

- Pisortat suliffeqarfippassuarnik tamakkiisumik ilaannakortumilluunniit piginnittuunerat oqallisineqartariaqalerpoq. Nutaamik isummernissamut tungavissarsiortariaqarpugut, Kuupik Kleist oqarpoq.

- Assersuutigalugu suliffeqarfiit, aningaasarsioriaatsit naliginnaasut toqqammavigalugit tunisassiortunut allanut unammillerlutik tunisassiaminnik tuniniasut, pisortat ingerlattariaqagaattut isigingilakka, naalakkersuisut siulittaasuat nangippoq.

Kisianni suliffeqarfiit suut namminersortunut tunineqassanersut taassuma massakkut taagorumanngilai.

- Piginneqatigiiffiit Namminersorlutik Oqartussanit toqqaannartumik pigineqartut 20-nit amerlanerupput, aammalu piginneqatigiiffiit 70-it palillugit piginneqataaffigalutigit, Kuupik Kleist oqarpoq.

Kisianni ingerlatseqatigiiffiit assigiinngitsut marluk inuiaqatigiinnit pigineqarlutik ingerlanneqarnissaat, Kuupik Kleistip pissusissamisoortuutut isigaa.

- Suliffeqarfiit pilersuinermik aallutallit, soorlu Tele Greenland oqarasuarsinnaanermik pilersuiviusoq, KNI, nioqqutissanik pilersuiviusoq, kiisalu Nukissiorfiit ilaatigut innaallagiamik pilersuisoq, naliginnaasumik pisortanit ingerlanneqarnissaat pissusissamisoorpoq, Kuupik Kleist oqarpoq.

Ingerlatsitseqatigiiffiit aamma allat pisortanit pigineqartariaqartutut isigisai tassaapput NunaOilitut ittut.

- Takorluungilara NunaOil, maanna tamakkiisumik pigilernikuusarput, pisortanit iperarneqassasoq. Nunatsinni aatsitassarsiornerup uuliasiornerullu aallartisarneqarnerani, piginneqatigiifik NunaOilitut ittoq pisariaqartinneqartussaammat, taannalu pisortanit pigineqarpat silatusaarnerussaaq, Naalakkersuisut siulittaasuat, Kuupik Kleist,oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq