Kuupik Kleist: Nunarsuarmioqatigiit isumaqatigiissuteqartariaqarnerat aalajangiusimavarput

Kalaallit Nunaanni suliffissuaqarnikkut ineriartornermi nukissat ataavartut atorneqarnerulernissaannut aningaasaleerusussappat, silap pissusaa pillugu isumaqatigiissut Københavmimi decembarimi atsioqatigiissutigineqartussaq, Kalaallit Nunaata atsioqataaffigisinnaavaa. Oqallissaarisoq Danmarkiminngaannersoq Bjørn Lomborg taama isumaqarpoq.
Allattoq Mads Lynge
aggustip 21-at 2009 16:33

Taanna naalakkersuisut siulittaasuannik Kuupik Kleistimik ullaap tungaa ataatsimeeqateqarpoq:

- Kalaallit Nunaata kissaatini unneqqqarissumik saqqummiussinnaasariaqarpai. Taamaaliornikkummi nunat allat assingusumik kissaateqartut sinnerlugillusooq saqqummissagaluarpoq. Kalaallit Nunaanni aningaasarsiornerup siuarsarneqarniarnerani nukissanik ataaavartunik atuinerulerusunneq 15-eriaammik annertusarneqartariaqarpoq, tassunga atatillugu ilisimatusarneq annertusarneqartariaqarluni. Nukissanik ataavartunik atuerusunneq taava ukiut 20-t 40-lluunniit qaangiuppata annertusarneqarsinnaassagaluarpoq, Bjørn Lomborg Radioaviisimut oqarpoq.

Taanna ulluni makkunani Kalaallit Nunaanniippoq, silap pissusaata allanngoriartornerata qanoq iliuuseqarfigineqarsinnaanissaa pillugu oqalugiariartorami.

Oqariartuutaalu paatsuugassaanngiilat:

CO2-mik aniatitsineq maannangaaq annikillisinniaannarlugu nunat tamalaat isumaqatigiissutaannik Kalaallit Nunaat atsioqataasariaqanngilaq:

- CO2-mik aniatitsineq massakkumiit aallartittumik annikillisinniarneqarnissaanik isumaqatigiissut oqariartuuteqarpat atsiussanngilarsi. Periusermi akisullunilu sunnmiuteqangaarnavianngilaq. Periusermi pineqartoq nunanit tamalaanit atorneqassappat ukioq 2100 tikikkutsigu ukiumut aningaasarpassuarnik atuiffiussasoq, missingersuutivut takutippaat, Bjørn Lomborg oqarpoq.

Isummat Lomborgimit saqqumiunneqartut naalakkersuisut siulittaasuannit Kuupik Kleistimit tamakkiisumik isumaqatigineqanngillat, Kalaallilli Nunaata silap pissusaa pillugu isumaqatigiissummut atsioqataanissaa taassuma siunnerfigaa:

- Nunatsinninngaanniit piumasaqaatit tapersersornartuutikkai paasivara. Tassa avatangiisinik mianerinninngikkaluarluniluunniit aningaasarsiornikkut ineriartornissamut aamma inissaqartariaqartoq, aammalu Nunatta Danmarkillu akornanni isumaqatigiinniarnerit eqqarsaatiaglugit Nunatsinninngaanniit piumasaqaatit taamaattut aalajangiusumaneqartariaqartut. Taamaammat oqaannarsinnaavugut soorunami nuannersoq tapersersuerpalaartumik oqaaseqarmat. CO2-mik aniatitsinerup Nunarsuaq tamakkerlugu annikillisinneqartariaqarnera soorunami aalajangiusimavarput, imaanngitsoq kikkulluunniit piumasaannarminnik mingutsitsisinnaasut. Taamaattumik Nunarsuarmioqatigiit arlaatigut isumaqatigiissuteqartariaqarnerat suli aalajangiusimavarput, Naalakkersuisut siulittaasuat Kuupik Kleist oqarpoq.

Bjørn Lomborg Ilulissanut ingerlaqqissaaq, Hotel Arcticimi pisussamik aqagu unnukkut oqalugiartussaagami.