Kuupik Kleist: Nunaqarfinnik matusiniarneq soqqusaanneruvoq

Demokraatineersoq Palle Christiansen arfininngormat oqarpoq, Nunaqarfinnik sullissineq maannakkutut ittoq akissaqartinngikkipput, taamaammallu nunaqarfiit ikilisarneqartariaqartut.

- Taama oqalunneq soqqusaanneruvoq. Nunaqarfiit 20-it 30-it matuneqassasut siunnersuutigaat. Taamaaliorneq Nunatsinnut iluaqutaanavianngilaq. Taava takorloorneqarsinnaavoq, nunatta inui tamarmik illoqarfinnut sisamanut eqiterutissasut, atugarlioqatigiillutalu inuusugut, Kuupik Kleist oqarpoq.

Inuit Ataqatigiit siulittaasuat isumaqarpoq, nunatsinni isorartuumi siammarluni nunaqarneq uppernarsaataasoq, Kalaallit Nunaat tamaat inuisa nunaginerannut, nunalu tamaat najunngikkunikku periarfissanut mattussissasut. Nassuerutigaali, nunaqarfinniit illoqarfinnut ukiuni kingullerni amerlasuuni nutsertoqartoq, soorlu nunarsuup sinnerani aamma taama pisoqartoq.

- Kisianni tassanngaanniit nunaqarfinnik qulaaniit inuerutitseqqusineq allarluinnaavoq. Amerlaqaagut inunngorfigisatsinniit nuutsitaanikuusugut, taamalu misigisaqarneq iluaqutaanngilaq. Nukillaarsaataavoq tarnikkullu nanertuutaasarluni. Illoqarfinni suliffissaqarluni, najugassaqarluni meeqqanullu paaqqinniffissaqarpat tamanna immini assuarnanngilaq. Matusinissaq periarfissatut siullertut isiginagu, ujartorneqartariaqarput, taamatut nunaqaannassagutta, taava sutigut pitsanngorsaasariaqarpugut, Inuit Ataqatigiit siulittaasuat, Kuupik Kleist, taama oqarpoq.