Kuupik Kleist Nunap inoqqaavisa pisinnaatitaaffeqalernerat Folketingimi persuarsiuutigaa
– Aallarniutigalugu oqaatigerusuppara septemberip ulluisa 13-at nunarsuarmi nunap inoqqaavinut 350 milliuuniusunut ulluummat pingaartoq, nunarsuarmi tamarmi nunap inoqqaavisa piginnaatitaaffii Naalagaaffiit Peqatigiinni ulloq tanna isumaqatigiissutigineqarmata, taama oqarpoq Kuupik Kleist folketingimi oqalugiarnini aallartikkamiuk.
Nunarsuarmi nunap inoqqaavi pillugit isumaqatigiissut Naalagaaffiit Peqatigiinni nunanit 143-nit akuerineqarpoq, taakkununngali ilaalluni Danmarki.
Nunarsuarmi tamarmi nunap inoqqaavi anginerusumik pisinnaatitaaffeqalersikkumallugit suliaqarsimasut Kuupik Kleistip qutsavigai. Kalaallit Nunaata namminersulernissaa pillugu isumaqatigiinniarnerit naammassilersut Kuupik Kleistip aamma isumalluarfigalugit oqarpoq.
– Tassunga atatillugu naatsumik oqaatigissavara upperigakku siunnersuisoqatigiinni isumaqatigiinniarnerit naammassiumaartut, Kuupik Kleist oqarpoq.
