Kuupik Kleist: Neriorsuutikka attattuassavakka

Taamaakkaluartoq Naalakkersuisut siulittaasuata, Kuupik Klesitip, neriorsuutini suli attappaa.

- Naalakkersuisuninngaanniit aalajangiusimavarput Danmarkimi kalaallit palaseqarnikkut kiffartuunneqarnerat ingerlaannassasoq. Taannalu allannguuteqanngilaq manna tikillugu. Isumaqatigiinniarnerit assigiinngitsut pissutigalugit ullumikkut allamik oqaqqissinnaanngilanga, Kuupik Kleist oqarpoq.

Kikkut isumaqatigiinniarfiginerlugit Naalakkersuisut siulittaasuata oqaatigisinnaannginnerarpaa.

Ilageeqarnermut Naalakkersuisoqarfik Danmarkimi palasit peqatigiiffiannut decembarimi 2009-mi allappoq, kalaallit palasiata atorfia Kalaallit Nunaannut nuunneqassasoq. Tamanna pivoq Naalakkersuisut siulittaasuata neriorsuinerata kingorna qaammat ataaseq qaangiutiinnartoq.

Allakkami allassimavoq, issuaaneq aallartippoq: - "Namminersorlutik Oqartussat maanna pilersaarutigaat, atorfik Kalaallit Nunaannut nuunneqassasoq. Aamma Aningaasanut Inatsisissami siunnersuummi allassimavoq, januaarip aallaqqaataa 2011 atorfik aatsaat nuunneqassammat". Issuaaneq naavoq.

Taamaakkaluartoq Naalakkersuisut siulittaasuata isummani suli attappaa, tassa kalaallit Danmarkimiittut palasimit sullinneqartuassasut. Kuupik Kleist ima nangippoq:

- Pisortaqarfiup allagai takunikuunngilakka, taamaattumik suna tunngavigalugu taama allassimanersut oqaatigisinnaanngilara. Kisianni 2011-mut Aningaasanut inatsisissaq novembari naalerpat Inatsisartuni aalajangiiffigineqartussaavoq, taassuma tungaanut aaqqiinissaq ujartussavarput, Kuupik Kleist naggasiivoq.