Kuupik Kleist: Naatsorsuutit plutoniumimut tunngasut oqaatigisariaqarput
Nunanut allanut tunngasunik Danmarkimi ilisimatusarfimmit nalunaarusiami, ippassaq saqqummiunneqartumi, oqaatigineqarpoq, Pituffiup eqqaani immap naqqani qaartartoqanngitsoq.
Taamaattorli nalunaarusiami tikkuarneqarpoq, sakkut timmisartullu aseqqukuata uuttortarneqarnerisa inernerisa, kalaallinut danskinullu saqqummiunneqarnissaat amigaataasoq.
Taamaattumik Naalakkersuisut isumaqarput, saliinerup nalaani qanoq annertutigisumik plutoniumeqarsimanera amerikamiunit saqqummiunneqartariaqartoq. Naalakkersuisut siulittaasuat Kuupik Kleist suliaq pillugu paasitinneqarnissamik piumasaqarniarpoq:
- Suliap pineqartup naammassineqarnissaa nunat pineqartut pingasuusut tamarmik soqutigisariaqarpaat. Taamaasiortoqassappalli saliinermit paasissutissat kalaallinut danskinullu saqqummiunneqartariaqarput. Apeqqut taanna danskit Nunanut Allanut Naalakkersuisuannut qaqilerniarpara, taamaalilluta ataatsimoorluta saliinerup nalaani uuttortaanerit inernivii pillugit paasissutissinneqarnissatsinnik USA-mut piumasaqarsinnaaniassagatta, Kuupik Kleist oqarpoq.
Peqqinnissakkut avatangiisinillu misissuinerit suli alapernaanneqartariaqarput, aamma danskit kalaallillu peqqinnissakkut avatangiisitigullu oqartussaasuisa suleqatigiinnerat ingerlaannassaaq, Kuupik Kleist oqarpoq.
