Kuupik Kleist naalakkersuisuni nuannarineqarnerpaavoq

Naalakkersuisuni nuannarineqarnerpaanik misissuinermi Kuupik Kleist nuannarineqarnerpaavoq, Anthon Frederiksenilu tapersersortikinnerpaalluni.
Allattoq Mads Lynge
decembarip 30-at 2010 17:24

HS Analyse Sermitsiaq suleqatigalugu inunnik isumasiuisimavoq.

Ataatsimut isigalugu Naalakkersuit innuttaasut naliliinerat naapertorlugu ukioq kingullermit ukioq manna ajunnginnermik ingerlapput.

1-imiit 5-imut uuttuutigalugit, Kuupik Kleist agguaqatigiissullugu 3,68-imik nalilerneqarpoq, ukioq kingullermit qaffassimalluni.

Anthon Frederiksenip nalilerneqarnera aamma qaffassimavoq, agguaqatigiissillugu 2,54-imik nalilerneqarami. Demokraatit siulittaasuata, Ineqarnermut, Attaveqarnermut Angallannermullu Naalakkersuisoq Jens B. Frederiksen, ukioq kingulleq appasinnerpaamik nalilerneqarnikoq appasinnerpaajujunnaarpoq.

Naalakkersuisut ataatsimoorlutik agguaqatigiissillugu 3,12-imik nalilerneqarput, ukioq kingulleq 2,86-imik nalilerneqarnerminnit ajunnginnerusumik.

Naalakkersuisuni ukioq kingullermit nalilerneqarnermini appartutuaq tassaavoq Aalisarnermut Piniarnermut Nunalerinermullu Naalakkersuisoq Ane Hansen. Ukioq manna appasinnerpaat tulliattut nalilerneqarluni.

Nalilersuinermi tupaallaatigineqarnerpaasinnaasoq tassaagunarpoq Demokraatinik qinersisartut Naalakkersuisuni naammaginnginnerpaasaat tassaammat Demokraatit siulittaasuat Jens B. Frederiksen.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq