Kuupik Kleist Lars-Emil Johansenilu CIA-p timmisartuutaat pillugit apeqquteqaqqipput

decembarip 21-at 2005 16:58

CIA-p timmisartuutaasa isertortumik timmisartuussisarneragaanerat pillugu, Danmarkimi ministeriuneq nunanullu allanut ministeri, Folketingimut ilaasortat Kuupik Kleistip Lars-Emil Johansenillu nutaanik apeqquteqarfigaat.

CIA-p timmisartuutai Kalaallit Nunaanni mittarfeqarfinnut ikinnerpaamik arfinileriarlutik akunnittarsimanerannut AG-p saqqummiussaa tunngavigalugu apeqqutit pinngorput.

Atlantikup Avannaani Suleqatigiinni kalaallit ilaasortat, pisoq pillugu novemberimi kingullermik apeqquteqaramik, Angallannermut ministerimut saaffiginneqquneqarput. Ministeriuneq Anders Fogh Rasmussen taamani ilisimatitsivoq, timmisartut pineqartut Kalaallit Nunaannut akunnittarsimanerat pillugu nalunaaruteqanngitsoq.

Nalunaarutit nutaat avammut saqqummiunneqarnerisa kingorna ministerit taakku marluk iliuuseqarsimanersut Kuupik Kleistip Lars-Emil Johansenillu tassa maanna paaserusulerpaat.

Nunanut allanut ministeri Pituffik pillugu aamma nalunaarusioqquneqarpoq. Pituffimmi mittarfik CIA-p timmisartuutaanit isertortukkut aqqusaarneqartarsimannginnersoq Kuupik Kleistip paaserusuppaa.