Kuupik Kleist Københavnimi takujumaneqaqaaq

Naalakkersuisut pilersaarutaat pingaarnerit Kuupik Kleistip saqqummiuppai, apeqquteqarusuttullu apeqquteqartarput. Tusarusunneqarluartunut ilaavoq nunaqarfiit siunissaat.

- Nunaqarfiunersut illoqarfiunersulluunniit isiginiarneq ajorparput, Nunatsinnili sumiiffinni assigiinngitsuni suut periarfissaanersut eqqarsaatigineruarput, Kuupik Kleist oqarpoq.

Sumiiffinni assigiinngitsuni periarfissat pilersaarusiornissaat Naalakkersuisut sulissutiginiarpaat, assersuutigalugu Kujataata Kalaallit Nunaannut inuussutissarsiutinngortinneqarnissaa pilersaarutaavoq.

- Inuit imminnut pilersorsinnaanissaat anguniarparput, Kuupik Kleist oqarpoq.

Kalaallit Illuutaannut tusarnaariat tusarusutaannut aamma ilaavoq kammalaatersorneq, tamanna Naalakkersuisut siulittaasortaavanit qanoq iliorfiginiarneqarnersoq paaserusunneqarluni. Kuupik Kleistip tassani tikkuarpaa suliffeqarfippassuit pisortanit pigineqarnerat.

- Politikki inuussutissarsiornerlu siunissami imminnut ullumikkutuut qanitsigissanersut ilungersuullugu massakkorpiaq eqqarsaatigaarput, Kuupik Kleist nassuiaavoq, aamma tikkuarlugu piginneqatigiit, tassa aktieselskabit, akileraartartunut aningaasarsiutaaginnalersimasut, isertitsissutaanatik.

Naalakkersuisut siulittaasuata aamma uparuarpaa kammalaatersorneq Kalaallit Nunaata pilersitarinngikkaa.

- Ilinniartikkuminartorujussuusugununa, ilikkajjaqaagullu, Kuupik Kleist oqarpoq, Kalaallit Illuutaannullu tusarnaariat quiatsatserujussuarlugit.