Folketingimut IA sinnerlugu ilaasortaq Kuupik Kleist isumaqarpoq Kalaallit Nunaat Danmarkimut pitsaasumik isumaqatigiissuteqartariaqartoq, soorlu Savalimmiut 1992-imi taamaaliortut.
Kalaallit Nunaat uuliamit allanilluunniit nunap pisuussutaanik isaatitsillualissagaluarpat aaqqiagiinngittoqalernissaa Kuupik Kleistip naatsorsuutigaa.
- Aatsitassarsiornermut aningaasartuutitik isertitallu Savalimmiut tamaasa oqartussaaffigaat. Isumaqatigiissummi aamma allassimavoq, ataatsimoortumik tapiissutit isumaqatigiinniutigineqassasut, tassa pisortat iluanaaruteqartalerpata. – Taama pitsaatigisumik aaqqiivigineqarusuppugut, Namminersorneq pillugu Ataatsimiititaliarsuup ataatsimiinnissaa sioqqullugu Kuupik Kleist oqarpoq.
Qaammatip uuma aallartinnerata missaani ataatsimiittoqarmat danskit kalaallillu politikerii imminnut ungasissorujussuupput. Isertitat assigiimmik avinneqartarnissaanik siunnersuut kalaallinit akueriumaneqanngilaq.