Kuupik Kleist: Isumaqatigiissuteqanngikkutta allanik suleqatissarsiortariaqassuugut
Silap pinngortitallu eriaginissaa suusupagineqarnani politikkeqartoqartariaqarpoq, aammali kisianni nunatta namminersortutut imminut nappassinnaanissaa anguneqassappat CO2-kvotet pigineqanngitsut pissarsiarinissaat qulakkeerneqartariaqartoq Kuupik Kleist oqarpoq.
- Isumaqarpunga qularutigineqarsinnaanngitsoq taanna qanillattussagipput, apeqqutaaneruvoq qanoq ililluta. Isumaqatigiissutinut qanoq ittunut ilaanissarput imaluunniit avataaniinnissarput apeqqutaavoq.
- Nunatsinni aningaasarsiornikkut siuarsaanissaq pisariaqartipparput, apeqqutaanerusoq unaavoq qassinik ikinnguteqalerluta imaluunniit ikinnguteqarunnaarluta taamaaliussanersugut, taamaattumik isumaqatigiiniarnerit tullinnguuttut pingaaruteqarput, nunanik allanut suleqateqarnitsinnut tunngassuteqartussaangamik. Qularutigineqassanngilaq nunatta aningaasarsiornikkut ineriartornissaa periarfissinneqassasoq.
Conie Hedegaardilu qaqugu naapeqqissavisi?
- Pisariaqarfiatigut naapittassuugut, aamma decembariutinnagu aalajangiisumik isumaqateqariissalluta neriuutigaarput, taammaanngippat uagut nammineerluta allanik ujartuisariaqaratta, taamatut oqarpoq naalakkersuisut siulittaasuat Kuupik Kleist.