Kuupik Kleist isumalluanngilaq

Silap pissusaata allanngoriartornera pakkersimaarniarlugu nunarsuarmioqatigiit ataatsimeeqatigiinnerat, COP 16, aqagu naammassisussatut pilersaarutigineqarpoq.

Kisianni Naalakkersuisut siulittaasuat, Kuupik Kleist, Naalagaaffeqatigiit aallartitaannut peqataasoq, angusaqarluarnissamik isumalluanngilaq.

- Ippassaq unnukkut kingusissoq tikillugu, aammalu ullaaq manna nalunaarutigineqartut eqqarsaatigalugit nalunartorujussuuvoq ataatsimeersuarneq manna qanoq inerneqarumaarnersoq, Kuupik Kleist oqarpoq. Taassuma ilanngullugu oqaluttuaraa nunanit aallartitanit isumaqatigiittoqarsinnaanera neriuutigineqarpianngitsoq.

- Aarleqqutigineqarpoq tunniutiinnartoqarsinnaasoq, aammalu isumaqatigiittoqarsinnaannginneranik nalunaaruteqarnissaq soorunami pinngitsoorniarneqarpoq. Taamaammat ataatsimut isigalugu isumaqatigiittoqarnissaanik neriuutissaqartoqarpallaanngilaq, Kuupik Kleist oqarpoq

Nunat pissaanillit akisussaaffimmik tiguserusunnginnerat isumaqatigiinnissamut isumalluartitsinngitsoq, nunallu mikinerit aamma isumaqatigiissinniarnerat ajornakusoortoq Kuupik Kleist ilanngullugu oqaatigaa.

- Ajornakusoortua uaniippoq, siullermik naalagaaffiit pissaaneqarnerpaat USA Kinalu allaninngaanniit aaliangersimasumik pisussaaffeqalernissartik tunuarsimaarfigisorujussuugamikku. Aamma nunat suliffissuaqarnikkut inerisarneqarsimasut nunat ineriartorfiusut soqutigisaannut naapitikkuminaapput. Ajornartorsiorneq piviuvoq, tamakku qaangersinnaanngikkaanni takorlooruminaappoq isumaqatigiittoqarnissaa, Kuupik Kleist oqarpoq.

Ukioq kingulleq COP 15-qarnerani Københavnimi ingerlanneqartumi isumaqatigiissutigineqartup ingerlaannarnissaa Kuupik Kleistip nuannaarutigaa.

Ukioq kingulleq isumaqatigiissutip imaraa, Kalaallit Nunaata CO2-mik aniatitsinerminik akiliinissaata annertusimagaluartup millisinneqarnera.

- Kyoto-mi isumaqatigiissutip, 2012-p naanissaanut atuuttup nunatsinnut pisussaaffiliinera eqqarsaatigalugu, akiligassinneqarnissatsinnik ilimasunnerput suli atuuppoq, kisianni siorna naatsorsorneqartuninngaanniit amigaatigisassagut CO2-mik aniatitsineq eqqarsaatigalugu massakkut akiligassat annikinneerarsuanngorput. Taamaalilluni nunatta aningaasaataanik akiliinissaq annikinnerulerpoq, tamanna naammagisimaarparput, Kuupik Kleist oqarpoq.

Danmarkimi silap pissusaanut ministerip Lykke Friisip COP 16-imi oqalugiarnermini ilaatigut Kalaallit Nunaat pillugu oqalugiarpoq.

- Nunatsinnut tunngasut, issittumut tunngasut aammalu nunat inoqqaavisa soqutigisaannut tunngasut saqqummiunneqarput. Qujanartumik uagut suliniutigisagut taama takutinneqarput. Uagut issittumiit kisitta maani peqataatitaqaratta, taamaattumik tamakkunatigut sunniuteqarnissarput pingaaruteqarpoq, Kuupik Kleist oqarpoq.

COP 16-imi ataatsimeersuarneq aqagu naassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat