Kuupik Kleist: Inuiaqatigiit aningaasaataat sanngiinnerusunut

Inatsisartut ukiaq manna ataatsimiinneranni meeqqat atugarissaarnerunissaannut ilaqutariillu isumaginninnikkut pitsanngorsaaffigineqarnissaannut tunngasunik Inuit Ataqatigiit tallimanik siunnersuuteqarsimasut, Kuupik Kleist oqarpoq. Taakkunanngali ataasiinnaq akuerineqarsimasoq unnerpaa.

- Naalakkersuinikkut piumassuseq aalajangiisuuvoq. Oqartariaqarpungali erseqqissumik, Inatsisartut suna tamaat aaqqissinnaanngilaat. Taakkua tassaassapput, periarfissiillutillu sinaakkusiisut. Akisussaaffik soorunami ilaqutariinniippoq.

Ilaqutariit sanngiinnerusut, namminneerlutik aqqutissiornissamut nukissaqanngitsut, qanoq pineqassappat?

- Isumagiuarparput, ikiorneqarnissamik pisariaqartitsisut, soorlu aningaasanik ikorneqarnissamik pisariaqartitsisut, salliutinneqartariaqarput, Kuupik Kleist oqarpoq.

Nunatsinni kikkulluunniit assigiimmik tappiiffigineqartarnerat taamaatinneqartariaqartoq, Kuupik Kleist isumaqarpoq. Assersuutigalugu meeqqanik ileqqaartitsinermik taaneqartartoq, qanorluunniit isertitaqartunut pinngitsoornani tuniniunneqartartoq, Nunatta Karsianut 20 mio. koruuniinik ukiumut naleqartarpoq.

- Tassa pissakinnerit ikiortariaqartullu salliutinneqaratik,kisiannili inuiaqatigiit tamarmik assigiimmik pineqarnissaat siunertaralugu Naalakkersuisut iliuuseqartarput. Periaaseq taamaattoq massakkut pissutsinut iluaqutaanngilaq. Aningaasat suliniutissanut, massakkut pisariaqartinneqartunut atorneqartariaqarput, Inuit Ataqatigiit siulittaasuat, Kuupik Kleist, oqarpoq.