Kuupik Kleist: IA-mi siulittaasunngussaguma folketingimi ilaasortaaginnarusuppunga

Kuupik Kleist IA-mi siulittaasunngussaguni folketingimi ilaasortaanini attatiinnarniarpaa.

Inuit Ataqatigiinni siulittaasussasut siulersuisuunernit inassutigineqartoq malillugu, partiip aallartitaasa Kuupik Kleist partiimi siulittaasutut toqqassappassuk, atorfigilissaneraa ulluni tullerni ataatsimeersuarnermi pisut takutikkumaarpaat.

Inuit Ataqatigiit ukioq allortarlugu ataatsimeersuartarneranni tullermi Maniitsumi aqagu aallartittussami, Josef Motzfeldt siulittaasutut tunuarniarluni nalunaareerpoq, sapaatiuppallu siulittaasussamut qinersisoqalerpat, Kuupik Kleisti siulittaasunngussaguni folketingimi ilaasortaanini tigummiinnarusuppaa.

Ataatsimeersuaqataasut partiimi siulittaasuutigissanngitsoq aalajangissappassuk, nammineq folketingimi suliani salliutissallugu Kuupik Kleist radioavisimut ullumi oqarpoq.

- Partiimi siulittaasoq siulittaasuunermi saniatigut folketingimi ilaasortaasinnaanngippat pissuseq nutaarluinnaassaaq, tassami IA siornatigut siulittaasoqartareernikuuvoq folketingimut qineqqusaartumik. Kuupik Kleist oqarpoq.