Kuupik Kleist: Espersen akuersaarneqarsinnaanngitsumik iliorpoq
Inatsiseqarnermut ministerip Nunatsinni inatsiseqarnermut aamma ministeriusup Lene Espersenip, nunatta Canadamit puisit amersisalersinnaanissaannik naalakkersuisut periarfissiiinerannut atatillugu, sapaatip-akunnerata matuma siuliani sakkortuumik uparuaanera, Folketingimi ilaasortaatitatta aappaata Kuupik Kleistip IA-meersup akuersaarnartinngilluinnarpaa. Kuupik Kleist ima oqarpoq:
- Isumaqarpunga akueriuminaatsorujussuusoq inatsiseqarnermut ministeri aamma nunatsinni inatsiseqarnermut ministeriusoq, Danmarkimi naalakkersuisut sinnerlugit taamatut oqaaseqarmat. Aamma isumaqarpunga nunatsinni aningaasarsiornissamut inuuniarnissamullu periarfissat ikittuaqqat ilannguat taamatut saassullugu oqaaseqarnera akueriuminaatsorujussuusoq.
Kuupik Kleist erseqqissaavoq Lene Espersenip uparuaanera uumasut qanoq pineqartarnerannikisiginneriaatsimik Canadamilu puisinniartarnerup qanoq ittuuneranik tusaamasat naapertorlugit oqaaseqarnera toqqammavissaqanngitsoq.
Kuupik Kleist Lars-Emil Johansenilu nunarput sinnerlugu Folketingimi qinigaasutut iliuuseqarnersut aperigatsinni Kuupik Kleist ima akivoq:
-Uanga piffissami kingullermi qaammatinilu qaangiuttuni maani Danmarkimi tamakkua sammisimavakka, avisini oqallinnernilu assigiinngitsuni, qisuariarfigineqartarlungalu soorunalimi kisianni periarfissaq tulleq annertuumik iliuuseqarfigineqarnissaanut tassaavoq; sisamanngorpat Folketingip upernaaq-manna naggataarluni ataatsimiinnerani oqillinnissami saqqummiussinissara pilersaarutigaara.
Lene Esperseni utoqqatseraluarpalluunniit tamatuma sumut iluaqutaanissaa Kuupik Kleistip nalorninartoqartippaa.
-Kisianni Danmarkimi naalakkersuisut aammalu Folketingi pimoorunnerullugu aqqutissiueqataasariaqarput inuussutissarsiornikkut periarfissatsinnik atuilluarnissatsinnut. Tassa issittumi inuuniarneq tassaavoq uumassusilinnik inuuniuteqarneq, tamannalu paasineqartariaqarpoq.
Kuupik Kleist nunatsinni naalakkersuisunut kissaateqarpoq paasisitsiniaaqqullugit.
- Puisinniarnerup ulluni makkunani taama annertutigisumik sammineqarnerata nalaani naalakkersuisutigoortumik annertuumik paasisitsiniaasoqartariaqartoq, aammalu paasitinneqartariaqartoq issittumi uumasut pineqartarnerat qanoq ittuunersoq, aammalu inuussutissarsiutigigatsigu illersortariaqaripput.
Folketingimi ilaasortap aappaa Lars-Emil Johansen nunatsinnilu naalakkersuisut siulittaasuat Hans Enoksen Lene Espersenip uparuaaneranut tunngatillugu oqqaseqartinniaraluaratsigu iluatsinngilarput.
