Politikki

Kuupik Kleist: Borgmesterit akileraarutit isumaqatigiissutigisariaqarpaat

Kommunit aningaasatigut qanoq iliorsinnaassusaat assigiinngippallaaqaaq taamaattumik akileraartarneq eqqarsaatigalugu nalimmassaanissaq pisariaqarpoq, Kommune Kujallermi borgmesteri taama Naalakkersuisunut ippassaq piumasaqartoq tusareerlugu Naalakkersuisut siulittaasuata, Kommune Kujallermi borgmesterimut arsaq ingerlateqqippaa oqarluni, kommunit Nunatsinni sisamaasut tamanna pillugu isumaqatigeeqqaartariaqarmata nalimmassaaneq Naalakkersuisunit aaqqeeqataaffigineqassappat.

Allattoq Apollo Jeremiassen

septembarip 20-at 2012 12:26

Naalakkersuisut siulittaasuat, Kuupik V. Kleist tamanna pillugu ullumi ima KNR-mut oqarpoq.

- Naalakkersuisut kisimiillutik aalajangersinnaanngillat, akileraartarneq imatut imatullu aqagu allanngortinneqassaaq. Kommunit akunnerminni arlaatigut isumaqatigiissuteqartariaqarput, akileraartarneq kommuninut tunngasoq aallanngortinneqassappat, Naalakkersuisut siulittaasuata taama oqarpoq.

Kommune Kujallermi borgmesterimit eqqaamaqquneqarpoq, kommunit aningaasakilliornerit qaffasinnerusumik akileraarusiisaraluarlutik innuttaasut sullinneqarneri kommuninut aningaasarissaarnerusunut naleqqiullugit ajornerunerat, taamaattumillu piumasaralugu akileraarutitigut nalimmassaasoqarnissaa.

Nalimmassaasoqarnissaali kommunit akornanni assortuussutaavoq. tamannalu pillugu Naalakkersuisut siulittaasuat, Kuupik V. Kleist ima oqarpoq.

- Kommunalbestyrelsit qulaatiinnarlugit Naalakkersuisut Inatsisartulluunniit aalajangernavianngillat. Nalunngilarput akileraarutitigut nalimmassaaneq kommunit akornanni aamma Naalakkersuisut kommunillu akornanni isumaqatigiinngissutaammat. Isumaqatigiinngissutaasut qaangerneqartariaqarput aamma piffissalersuisariaqarpugut allannguinissaq qaqugu pissanersoq anguneqassappat, Naalakkersuisut siulittaasuat Kuupik V. Kleist taama oqarpoq.

Kuupik Kleist: Borgmesterit akileraarutit isumaqatigiissutigisariaqarpaat

Aamma atuaruk