Kuupik Kleist BBC-mi Hardtalkimi toqqarneqartoq
Inuit nuimasut assigiinngitsut Stephen Sackurip ukiup ingerlanerani Hardtalkimi apersorpai, apersukkanilu pingaarnersioramigit naalakkersuisut siulittaasuata Kuupik Kleistip apersorneqarnera pingaarnerit ilaattut toqqarpaa.
Israelimi siornatigut ministeriunerusimasoq Ehud Olmert, Afghanistanimi nunanut allanut ministeriusimasoq Abdullah Abdullah kiisalu aningaasarsiornermi pingaaruteqartut ukiup ingerlanerani apersorneqarput.
Aallakaatitassiaq Hardtalk, BBC-kkut aallakaatinneqartarpoq, ataqqineqarnerpaanullu ilaalluni.
Hardtalk nunarsuaq tamakkerlugu aallakaatinneqartarpoq, aallakaatitassiat 300-t missaat ukiup ingerlanerani aallakaatinneqartarlutik.
Silap pissusaata allanngoriartornerata nunarsuarmut sunniuteqaatai BBC-p saqqummersinniarsaraa, Kalaallillu Nunaat pingaarnerit ilaattut toqqarneqarluni.