Taama oqarnermigut, inatsisartut aningaasanut aappagumut inatsisissaanut atatillugu IA-isumaqatigiinniaqataasinnaannginnerarpaa.
IA inissisimaffigerusutaminiippoq, sunniuteqarani, Lars-Emil Johansen oqarpoq. Tamannali ilumuunngilluinnartoq, Inuit Ataqatigiit siulittaasuat Kuupik Kleist oqarpoq.
-Tassami Naalakkersuisuninngaanniit anisitaanerput kiap pisuussutigineraa eqqartorneqarsinnaassaaq, soorunalimi. Kisianni aappaagumut inatsisissamut atatillugu sunniuteqarnissarput qularinngilluinnarpara, Kuupik Kleist aallartippoq, nangillunilu.
- Inuit Ataqatgiiit inatsisartuni sulinermi mattunneqarsinnaanngillat, aamma inissisimanerput naapertorlugu sunniuteqarnissarput sulissutigissavarput, soorunalimi.
Naliliiffigisassat toqqaannartumik eqqaaneqartut, akit assigiikkunnaarsimanerata nalilersuiffigeqqinneqarnissaanut aamma angallannermut tunngasut aamma peqataaffigissavaat.
-Akit assigiikkunnaarsimanerata akuttunngitsumik nalilersuiffigiuarnissaa inatsisartuni ukiut arlallit matuma siornagulli aalajangerneqareerpoq, uagullu peqataaffigaarput peqataaffigissallugulu.
Angallanneq eqqarsaatigalugu umiarsuakkut angallanneq kujataani avannaanilu naliliiffigeqqittariaqartoq, IA-p upernaaq ataatsimeersuarnermini aalajangiiffigaa.
-Kaffisoriartoqqusaanngikkaluaruttaluunniit peqataaffigissavarput, IA-p siulittaasua erseqqissaavoq.
Inatsisartunut qinigaanikuugamik ataatsimiititaliallu tamaasa peqataaffigigamikkut sunniuteqarnissaq IA-mi siulittaasup qularinngilaa.
- Naalakkersuisooqataanitta nalaani, aningaasaqarnermut naalakkersuisuutitaqarnitta nalaani, uagut anguniagarisarsimavarput sapinngisamik inatsisartuni partiit amerlanerpaat ukiumoortumik aningaasanut inatsisissaliornermi tunuliaqutaassasut, taannalu qimanneqarsimappat soorunalimi eqqumiigissavara. Kisianni naatsorsuutigaara aningaasanut inatsisiliornermi peqataalluinnassasugut aamma imaasinnaavoq taaseqataasugut kuerseqataasugullu.
- Inatsisiliornermi qaaqqusaanngikkaluaruttaluunniit soorunalimi sunniuteqaqataarusuppugut, aamma sunniuteqassaagut.
IA-p siulittaasua inatsisartunilu ilaasortaq Kuupik Kleist oqarpoq.