Kuupik Kleist: Angallannerup aaqqissuussaanera aaqqiivigineqartariaqarpoq

Inuit Ataqatigiit nunatsinni angallassinermut tunngatillugu oqallinnermut akuliupput, sinersortaatinillu angallassineq pitsanngorsaavigineqartariaqartoq oqaatigalugu:

- Nunatsinni angallanneq timmisartuinnarnik ingerlanneqarsinnaanngitsoq paasineqareerpoq, tamanna angalaniartut amerlassusaannut naammanngilaq amerlasuunullu akisuallaarluni, Inuit Ataqatigiit siulittaasuat Kuupik Kleist allappoq.

Timmisartuinnarnik angallassineq nunatsinni qimakkiartuaarneqarnersoq Kuupik Kleist aperigatsigu ima akivoq:

- Marloqiusamik angallassineq qimanneqavinnikuunngilaq. Aningaasartuutit eqqarsaatigalugit umiarsuarnut tapiissutaasarsimasut ilinniartitaanermut atorneqarnissaat aalajangiiffigeqataasimavarput, naak aalajangerniarneq taanna ajornakusooraluartoq, kisianni Inuit Ataqatigiit juunip aallaqqaataani Maniitsumi ataatsimeersuarneranni ataatsimeersuartut aalajangerput IA'p inatsisartuni ilaasortaatitaat peqataassasut ukua ajornartorsiutit pingaartumik kujataani avannaani umiarsuarnik angallassinermut tunngassuteqartut aaqqinneqarnissaannut peqataassasugut, aammalu aaqqiissutissanik nassaarniaqataassasugut, Kuupik Kleist oqarpoq, nangillunilu:

- Aaqqiinissamut aningaasaliinissaq eqqarsaatigalugu nutaamik tulleriiaarisoqartariaqarpoq, inatsisartullu angallannermut ataatsimiititaliaata ataatsimiissinneqarneratigut qanoq suleriaaseqarnissaq eqqartorneqartariaqarpoq, aamma isumaqarpunga SAS-ip Air Greenlandimut piginneqataassutsiminik tuniniaanera aamma ilanngulluni uani eqqartarneqartariaqartoq, Inuit Ataqatigiit siulittaasuat Kuupik Kleist oqarpoq.