Kuupik Kleist: Aatsitassarsiorneq pillugu piumasaqaateqartariaqarpugut

Nunatsinniit folketingimi ilaasortaasup Kuupik Kleistip oqaatigaa, nunatsinni aatsitassarsiornermut tamakkiisumik oqartussaalernissatsinnik aningaasarsiornikkullu aatsitassarsiornerup nunatsinnut tamakkiisumik iluaqutaalernissaanik massakkut piumasaqaateqartariaqalersugut.

Maanna danskit tusagassiorfiini tusarliunneqaqattaaleruttorpoq, nunatsinni uuliaqarfissuaqarnerarlugu Amerikamiut nalunaaruteqarsimammata Danmarki milliarderpassuarnik uuliasiornikkut isaatitsilernissaa ilimatsaanneqartalersoq.

Kalaallit Nunaanni aatsitassanik iluaqutiginninniarnermi aningaasartuutit isertitallu agguataarneri pillugit Danmarkip nunattalu akornanni isumaqatigiinniarnerit ingerlallualeruttortut tamanna pivoq.

- Erseqqissaatigissavara, qangalili nunatsinni aatsitassarsiornermi oqartussaanerup aningaasarsiornerullu tamakkiisumik nunatsinni oqartussaaffigineqalernissaa anguniartuaratsigu, Kuupik Kleist oqarpoq.

Taassuma neriuutigaa, Namminersorneq pillugu ataatsimiititaliarsuaq naammassippat tamanna anguneqarumaartoq.