Kuupik: Karsimi putu matuniaannarlugu iliuuseqarput
Piginneqataassutillu taakku Nunatta aningaasaqarneranut ima iluaqutaatigisutut Naalakkersuisunit nalilerneqarput, Namminersorlutik Oqartussanut tunineqarnissaat siunniunneqarluni. Piginneqataassutimmi Greenland Venture-imut tunineqarnissaat siunniunneqarpoq:
- Grønlandsbankenimi piginneqataassutivut agguagarsiffiusarnerat suliffeqarfimmut pineqartumut ima iluaqutinngortipparput suliffeqarfinnut siunnersuisarnermi nutaanillu aallartisaanermi aningaasat agguagarsissutigineqartartut iluaqutigalugit suliffinnik nutaanik pilersitsiortornissamut aningaasat taakku isaatitsinissaannut periarfissiisussaamata, Aningaasaqarnermut Naalakkersuisoq Vittus Qujaukitsoq Oqallinnermi ippassaq oqarpoq.
Piginneqataassutilli Greenland Venture-ip tunissutisiarissanngilai, akerlianilli 60 millionit koruunilertussaallugilli. Aningaasallt taakku suminngaanniit aaniarneqassanersut, Kuupik V. Kleistip apeqquserpaa, Greenland Venture-imi Namminersorlutik Oqartussanit tamakkiisumik pigineqarmat, tikkuarlugulu, piginneqataassutinik tunisineq karsimi amigaatinut aqqiiniutaannaasoq.
- 60-it millionit nalinganut piginneqataassutinik tuniniaaneq tassaavoq karsimi putup matuneqarnissaanut iliuuseqarneq. Imatut aningaasaliiffissanik siunissamut tikkuaasunik atorneqarnissaannik ilanngussaqartoqarani, Inuit Ataqatigiit siulittaasuat Kuupik V. Kleist oqarpoq.
