Kuupik: Ingattarserneq akueriuminaatsorlu
Isumaqatigiinniartoqaqqinnisssaanik Danmarkimi partiit, ilaatigut Konservativit Dansk Folkepartillu piumasaqarnerannut ministeriuneq, Helle Thorning-Schmidt, ippassaq ullup qeqqanut Radioaviisimi nipangertitsisoq, Kuupik Kleistip tamaalilluni isumaqatigilluinarpaa.
- Imatut oqarusuppunga; Ilumoorukkuminaatsorujussuuvoq, massakkut piiaaniarluni qinnuteqaat ataaseq tunniunneqarsimasoq tunngavigalugu taamatut piumasaqarnialersaarneq , immaqa sallaatsumik oqaatigissagaanni ingattarsernerusoq, Kuupik Kleist oqarpoq.
Nunatsinni pisuussutinit isertitaalerumaartussat qanoq agguarneqartarnissaat pillugit Nunatta Danmarkillu isumaqatigissutaata sinaakkutaasup isumaqatigiinniutigineqaqqinnissaanik Konservativit Dansk Folkepartilu ippassaq piumasaqaateqarput.
Tamanna pivoq savimminissamik piiaavissap Nuup Kangerluata qinnguani Isukasianiittup Nunatsinnut ukiut 15-it ingerlaneranni katillugit 32 milliardit koruuninik isertitsissutaassasoq, aviisi Berlingske allaaserisaqareersorlu.
Danmark Nunatsinnut ataatsimoortumik tapiissuteqartarpoq, ukiumut 3,4 milliardit koruuninik amerlassuseqartunik, isumaqatigiissutillu atuuttut malillugit, taakkua aatsitassarsiorfimmiit isertitat najoqqutaralugit ikilisarneqassapput. Kisianni tassa Danmark ataatsimoortunik tapiissutigisartakkani sinnerlugit aningaasanik Nunatsinniit pissarsisassanngilaq.
Radikalit Nunarput pillugu oqaaseqartartuat, Jeppe Mikkelsen, ippassaq nunatsinnut tapersiivoq.
- Eqqaamasariaqarpoq, ataatsimooortumik tapiissutitigut aningaasarpassuarnit toqqaannartumik tapiissuteqarnitta saniatigut aamma illersornissamut inatsisinillu atortitsinermut Kalaallit Nunaanni aningaasartuuteqartaratta, Jeppe Mikkelsen tunngavilersuivoq.
Namminersorneq pillugu isumaqatigiissut isumaqatigiissutigineqaqqittariaqalissappat taamaaliorneq Nunatsinut iluaqutaasariaqartoq, Kuupik Kleist oqarpoq.
- Namminersorneq pillugu isumaqatigiissutip aatsitassanut tunngasortaani aalajangersakkat qanoq sunniuteqarumaarnersut suli misilinneqanngillat. Imatut ilaatigut nipeqartinneqarami, nunatsinni aatsitassarsiornermi isertitaaajumaartussanit Danmark pissarsissanngitsoq. Kisianni ilumoortoq unaavoq, Naalagaaffik annertoorujussuarmik pissarsisussaavoq, sinneqartoorutit affaat pissarsiarisussaagamikkit. Taamaammat taanna naammagineqartariaqarpoq. Sulluginnittoqarpat tamanna ima isumaqassaaq, taakkua danskit politikeriisa piumasariniagaat tassaasoq, affaat sinnerlugit nammineq pissarsiaqarnissaq. Taannalu eqqarsaatigiinnarluguluunnit akueriumingatsupilussuuvoq, Kuupik Kleist oqarpoq.
Nunatta pisuussutaanit uumaatsunit isertitat qanoq agguataarneqartarnissaannik isumaqatigiissutip isumaqatigiinniutigineqaqqinnissaanik piumasaqaat Socialdemokraatit Venstrellu itigartereeerpaat.
