Kuupik: Danmarkip qanoq akulerusimatiginera soqutiginarneruvoq
DIIS-ip nunanut allanut tunngasunut ministerimut, Villy Søvndalimut allagaani toqqaannartumik oqaatigineqarpoq, amerikamiut ilumut nunarput qulaallugu tigusanik timmisartuussisarsimanersut, CIA pillugu misissuinermi akissutisinissaq naatsorsuutigineqanngitsoq. Tamatuminnga akissutissarsinissaq, DIIS-imut - nunanut allanut tunngasunut Danmarkimi ilisimatusarfimmut - suliassiissutaagaluarpoq, aammalu suliassiissut taassuma akueralugu.
DIIS-ip taama maanna nalunaarnerata, Naalakkersuisut siulittaasuat qulalersinnginnerpaa, taanna nunarput sinnerlugu qanoq pitsaatigisumik isumaqatigiinniarsimaneranik?
- Imannak oqaatigerusuppara, uuma pineqartup sammineqarnera tamaat nalornissutigineqartuaannarpoq, qanoq annertutigisumik nutaamik paasisaqartoqarsinnaanersoq, Naalakkersuisut siulittaasuat, Kuupik Kleist, Radioavisimut ullumi akivoq.
DIIS-imut suliassiissutip affaata aappaa, tassaavoq CIA pillugu misissuinerup siulliup qanoq ingerlanneqarsimanera misissussallugu. Tassa taanna Danmarkip naalakkersuisuinit ingerlanneqartoq inerniliisorlu, tigusanik ilumut timmisartuussisoqartarsimanersoq uppernarsineqarsinaanngitsoq. Tamannali Kuupik Kleistimut pingaarnerunngilaq:
- Kisianni misissugassatut isumaqatigiissutaasut eqqarsaatigalugit uanga suli isumaqarpunga, manna tikillugu annikinnerpaamik qulaajarneqarsimasoq tassaasoq, Danmarkimi naalakkersuisuusimasut qanoq annertugisisumik ilisimasaqarsimanerat imaluunniit qanoq annertutigisumik akulerusimasimanerat CIA-p timmisartuussisarsimaneranik pasillernermut tunngasumik. Taannalu soqutiginarnerpaajusutut uanga siusinnerusukkulli oqaatiginikuuara, Kuupik Kleist oqarpoq, imalu itisiliilluni:
- Nalornissutigineqartuaannarpoq, pingaartumik USA-mi toqqorsivinninngaanniit paasissutissat qanoq annertutigisut pissarsiarineqarsinnaanersut. Aamma uannut Naalakkersuisuusimasut arlaatigut ilisimasaqareersimanerat imaluunniit akulerusimasimanerat soqutiginarnerpaatut isigivara.
DIIS-illi aamma tikkuarpaa, piffissaliussaq sivikeqimmat, sulinissaq killeqassasoq. Nalunaarusiaq maajip aallaqaataani piareersimassaaq.
DIIS-ip suliaa ersarissumik maajip aallaqqaataata kingorna takutitsisinnaanngippat, ilissi annerusumik piumasaqassavisi?
- Tassami taanna massakkorpiaq soorunami oqaatigisinnaangilara. Kisianni imatut oqaatigerusuppara; pitsanngorsaataasinnaasunut tamanut ammassuugut, Kuupik Kleist akivoq.
Inatsisartut nunanut allanut sillimaniarnermullu tunngasunut ataatsimiititaliaata siulittaasua, Justus Hansen, ippassaq oqarpoq, misissuinissaq unitsiinnarneqartariaqartoq. Kuupik Kleistili taamaaliorumanngilaq:
- Isumaqarpunga, isumaqatigiissutaareersoq naapertorlugu misissuisoqartariaqartoq, Kuupik Kleist oqarpoq.
Misissuinissamut tunngatillugu aningaasartuutit Danmarkip Nunattalu avitseqatigiinniarnerannik isumaqatigiissutit ima paasineqassanngillat Nunatta aningaasartuutit affaat akilissagaat, Kuupik Kleist oqarpoq.
Nunatta akissaajaatissatuaraa, misissuinissami peqataatitassatta, Nunatsinnit toqqakkap misissuinermi peqataatinneqarnera.
