Kuupik Aleqalu naliliipput
Inatsisartut upernaakkut ataatsimiinnertik ullumi naggaserpaat. Naalakkersuinermili suliallit, qaammatini kingullerni pisoqarfioqisuni, anguniakkatik angusimanerlugit? Illuatungiliuttut siulittaasuata Aleqa Hammondip upernaakkut ataatsimiinneq ilaatigut ima nalilerpaa:
- Upernaakkut ataatsimiinnitsinni piffissaq angisooq atorlugu ataatsimiititaliarsuit suliaasa saqqummiunneqarneri isummersorfigaavut. Aalisarnermut inatsisissap piareersarneranut nukissaq annertooq atorsimavarput, naalakkersuisooqatigiinnut ilungersortumik paasissutissiissutigisarlugu aalisarnermut inatsisissap allannguutisssaa qanoq pingaaruteqarluinnartigisoq, tusarniutigineqarsimannginneraluunniit tunngfavigalugu tunuartittariaqarneranut nukissavut atorsimavagut, Aleqa Hammond oqarpoq.
Upernaakkulli ataatsimiinneq angusaqarfiuallaanngitsoq, Aleqa Hammond oqarpoq.
Ataatsimiinnermili naalakkersuinikkut angusat naammannersut Kuupik Kleistip oqallisigineqartuarsinnaanerarpai, ukiaaneranilu ataatsimiinnissamut piareersarneq aallartereersoq oqaatigalugu:
- Ilaatigut aningaasanut inatsisissatut siunnersuutissarput 2012-imut tunngasoq suliaralugu aallartereerpugut. Inatsisartut ataatsimeereeraangata aamma naalakkersuisunut suliakkiissutit annertuut ingerlanneqalertarput. Angalagaatsiartussaavugut suliat annertuut innuttaaqataasunut oqaloqatigiissutigiartorlugit, kuupik Kleis toqarpoq.
Upernaakkullu ataatsimiinnermi aalajangigassat annertuut tikikkiartorneqarnerat Kuupik Kleistip upernaakkut ataatsimiinnermi malunnarnerarpaa, aalajangigassallu annertuut ukioq manna piumaartut oqaatigalugit:
- Malunnarsiartorpoq aalajangigassat annertuut tikikkiartuaarivut, soorunami inatsisartut ataatsimiinnerannut tamanna malunniuppoq, partiit assigiinngitsut isummaminnik erseqqisaasariaqarnerannik kinguneqarluni, oqallinnerit eqqarsaatigalugit malunnarpoq aalajangigassat annertuut qanilliartorivut, Kuupik Kleist oqarpoq.