Kuupik: Aleqa kisimi aalajangiisariaqanngikkaluarpoq

Nunatsinnut tunngasut apeqqutit pillugit tamakkulu qanoq suliarineqarnissaat pillugit, Naalakkersuisut siulittaasuat, Aleqa Hammond tupinnanngitsumik annertuumik oqartussaassuseqarpoq akisussaassuseqarlunilu.
maajip 17-at 2013 11:46

Taamaakkaluartoq, Issittumi Siunnersuisooqatigiit ataatsimiinnerannit, Nunarput sinnerlugulusooq peqataaffigerusunnagu aalajangernera, apeqqutinik arlalissuarnik pilersitsivoq.

Nunat arlallit oqaasissaqaqatigiinneri qarsupillugillusooq, Aleqa Hammond iliornerarlugu, Sermitsiap pisortaata, Poul Krarup isornartorsiuivoq.

Tamassumunnga tapersiilluni, Naalakkersuisut siulittaasorisimasaat, Kuupik V. Kleist oqarpoq, Aleqa Hammond taama iliorsimasariaqanngikkaluartoq.

- Taama aalajangerneq annertoorujussuuvoq aamma annertuumik kinguneqarsinnaalluni. Taamaammat isumaqarpunga Naalakkersuisut kisimiilluni tamanna aalajangersinnaanngikkaa aammalu aalajangertariaqanngikkaluaraa. Tassami pingaaruteqarluinnarpoq inuiaqatigiinnut tamanut aammalu naalagaaffeqatigiinnerup iluani pissutsinut issittumilu suleqatigiinnermut pingaaruteqarluni, tamaammat inuup ataasiinnaap tamanna akisussaaffigisariaqanngikkalurapaa.

Inuit Ataqatigiit siulittaasuat, Kuupik V. Kleist taama oqarpoq.

Taassuma ilanngullugu oqaatigaa paasisinnaaneraraluarlugu Aleqa Hammondip aalajangernera, tassami Svenskinit oqaatigineqartareermat, Issittumi Siunnersuisooqatigiit tassammat, Nunanit naalagaaffinnit taamaallaat ilaasortaaffik.

- Issittumi Siunnersuisooqatigiinnik sinniisoqartitsinerput aallaqqaataaniilli eqqartorneqartuartarpoq. Ukiuni kingullerni svenskillu siulittaasuuffiisa nalaani eeseqqissarneqartarsimavoq, Issittumi Siunnersuisooqatigiit tassaasut naalagaaffiit suleqatigiiffiat, Kuupik V. Kleist oqarpoq nangillunilu.

- Kisiannili taamatut sinniisoqartitsinerup annertunerusumik ammasumillu eqqartorneqannginnerannut pissutaanerpaavoq, aarleqqutigineqarmat tamassuma aporaaffinngoriasaarsinnaanera, pingaartumi Cannada eqqarsaatigalugu, tassa nunap immoortuisa oqartussaassuseqarnissaat ukiorpassuarni eqqartorneqartarsimavoq. Nunarput Savalimmiullu allaqqasumik isumaqatigiinniarnernut peqataasalissagaluarpata, tassa tamanna Canadamut annertoorujussuarmik ajornartorsiutaalissagaluarpoq, Kuupik V. Kleist oqarpoq.

Pisumut tunngatillugu Aleqa Hammond oqaaseqartinniarsimagaluarparput, naammattuugassaanngimmalli taamaaliorsimasinnaanata. Siumup siulittaasuata tullia aamma Naalakkersuisunut ilaasortaq, Vittus Qujaukitsoq pisoq pillugu aamma oqaaseqarusunngilaq.

Naalakkersuisut siulittaasuata tulliata, Steen Lyngep, Atassut ippassaq oqaatigigaluarpaa, Issittumi Siunnersuisooqatigiit ataatsimiinnerannit peqataarusunnginneq Aleqa Hammondip kisimiilluni aalajangersimagaa, kingusinnerusukkilli nalunaarutigalugu tamanna Naalakkersuisut ataatsimoorullugu aalajangiussarigaat, tamannalu nuannaarutiginerarlugu oqaatigalugu.

Issittumi Siunnersuisooqatigiit ataatsimiinnerata naammassinerani Svenskit siulittaasuuffitsik Canadamut tunniuppaat.

Canadap siulittaasuuffimmik akisussaaffeqalernerani pissutsinik pitsaanerulersitsisoqarnavianngitsoq, Kuupik V. Kleistip oqaatigaa. Taamaattorli taanna oqarpoq naalagaaffeqatigiit tassa Nunarput, Savalimmiut Danmarkilu ataatsimoorfeqarlutik qanoq iliuuseqartariaqartut isumaqatigiinniarnernilu nuna sorleq siuttuulluni isumaqatigiinniartassanersoq isumaqatigiissutigineqarluni.

- Savalimmiut Nunattalu siunnersuisooqatigiinni mattunneqarnissaat takorlooruminaatsippara, Nunallu taakku naalagaaffeqatigiit ataatsimoorussisariaqartut uanga nammineerlunga isumaqarpunga, kisianni Issittumi Siunnersuisooqatigiit pisortatigoortumik oqaluuserisassaanni ilanngunneqartariaqarpoq, nuna sorleq isumaqatigiinniarnermi siuttuussanersoq. Aamma tamassuma ajornartorsiutivittut oqaluuserineqarnissaa siunnersuutigissavara.

Inuit Ataqatigiit siulittaasuat Kuupik V. Kleist taama oqarpoq.