Kuupik: Aleqa atorfilittami tunuannut toqqorterpoq
IA-p siulittaasua isumaqarpoq, Svend Hardenbergip sisamanngormat unnukkut nalunaarutaa Aleqa Hammondip piliarigaa, taamaaliornerlu iluarinngilaa.
Svend Hardenbergip oqaatigaa, Naalakkersuisoqarfiit qullersaat ataasinngorpat ataatsimiigiaqquneqassasut. Ataatsimiinnissarlu taanna Kuupik V. Kleistip eqqumiigaa. Soorluuna naalakkersuisut sunersut sunnginnersullu qanorlu aalajangiisimaneri atorfillit nassuiartussanngoraat, Kuupik V. Kleist isumaqarpoq.
- Naalakkersuisut atorfillit tunuannut toqqortertutuut pissuseqarlutik taamatut iliuuseqarnerat pissusissamisuunngilaq, Kuupik V. Kleist oqarpoq.
Aleqa Hammondip oqaaseqarumannginnera sumik pissuteqarsimasinnaanersoq taassuma paaserusuppaa.
- Eqqarsaqqajaanarpoq akisussaaffitsik akuersaarusunngikkaat, imaluunniit akisussaaffitsik naapertorlugu saqqummerusunngitsut. Imaluunniit arlaatigut iliuuserisimasat aalajangersimasallu pissusissamisuunngitsumik tunngaveqarluni aalajangiiffigineqarsimasut. Kisianni eqqoriaaginnarsinnaavunga, oqaaseqartoqarusunnginnera pissutigalugu.
Taava Naalakkersuisut siulittaasuat maanna oqaaseqassasoq, IA-p siulittaasua neriuppoq.
- Kajumissaarutigivara Naalakkersuisut akisussaaffitsik akueralugu apeqqutit tusagassiorfitsigut aammalu inuit akornanni sammineqartorujussuit pillugit nassuiaateqassasut namminneerlutik.