Kuupik Alcoamit tatisimaneqarnani oqarpoq
Inatsisartut ippassaq unnukkaa matoqqasumik ataatsimiinneranni, Naalakkersuisut siulittaasuata, Kuupik V. Kleistip utaqqisinnaannginnermik oqarsimaneragaanini eqqunngitsuusoq maanna oqaatigaa.
Matoqqasumik ataatsimiinnerup nalaani utaqqeqqissinnaannginnermik Naalakkersuisut siulittaasuata oqarnera, Radioaviisimi ulloqeqqanut, tusakkavut najoqqutaralugit issuarparput.
Inatsisit suut qanorlu ittut Nunatsinni atuutsinneqarniarnersut, ingerlatsivissuarnit angisuunit Nunatsinni aallartitsiniartunit, taakkununnga ilaallutik Alcoa, utaqqeqqissinnaajunnaarnerannik oqalunneq, Inatsisartut ippassaq unnukkaa matoqqasumik ataatsimiinerisa nalaanni Radioaviisimit tusarparput.
Tusakkat taamaattut uppernarsineqarput, Siumup siulittaasuanit, Aleqa Hammondimit, Facebookikkut ullumi allataasigut, taanna ima allappoq, issuaaneq aallartippoq: "Ajorluinnarpoq: Suliassat angisuut pillugit inatsit akueripallattariaqarparput kingusinnerpaamik 7. december, inatsisartut immikkut aggersarneqarlutik, utaqqisoqarmat!", issuaaneq naavoq.
Naalakkersuisut siulittaasuat, Kuupik V. Kleist ualeq manna ima aperivara, suliffeqarfissuarnik Nunatsinni aallartitserusuttunit tatisimaneqannginnersut, Naalakkersuisullu siulittaasuat, Kuupik V. Kleist ima akivoq.
- Naamerluinnaaq. Tassa Inatsisartut matoqqasumik ataatsimiinneranniit suut oqaluuserisimanerlutigit oqartussaatitaanatalu oqaqqusaanngilagut. Taamaallaat Naalakkersuisuni malittussaavarput Inatsisartut qanoq aalajangiussaqarsimanersut, ullullu aalajangiussaat naapertorlugit sulisussaalluta, Kuupik V. Kleist oqarpoq.
Inatsisartut Inuussutissarsiornermut ataatsimiititaliaata, inatsisit allannguutissat suliarineqarnissaat kingurteqqullugu arlaleriarlutik piumasaqartarput, suliaq torersumik naammaginartumillu suliarineqassammat. Naalakkersuisulli tuavisaaripput.
