Kuupik akuliuteqqullugu qinnuigaa

Nunaqarfinni isorliunerusunilu nanginik eqalunnullu qassutinik amigaateqartoqarpoq:

- Angalaninni innuttaasunik ataatsimiititsigaangama innuttaasut ikioqqullutik politikkikkut akuliuteqqusarpaannga. Pissutsit taamaattut naammaginanngillat, taamaammat Naalakkersuisut akuliuttariaqarput pilersuinerlu pitsaasoq qulakkeerlugu, Aleqa Hammond, Qeqertarsuarniittoq, KNR-imut taama oqarpoq.

Upernaviup Tasiilallu nunaqarfiini sikoqarnera pissutigalugu pilersuinissamik ajornartorsiortoqartareersorlu taama piumasaqarpoq.

Pisiniarfiit inuussutissanik nalinginnarnik amigaateqarput. Sikulli kisimik pilersuiniarnermut ajornartorsiortitsinngitsut Aleqa Hammond isumaqarpoq. Pilersuiniarnerup kinguaattooqqanera sikoqanngikkallartillugu Pilersuisup pisiniarfimminik pissamaatissanik pilersuinnginneranik aamma kinguneqartoq, Aleqa Hammond isumaqarpoq.

Pissutsit naalakkersuisoqarfimmit malinneqartut Ineqarnermut angallannermullu Naalakkersuisup Jens B. Frederiksenip qanittukkut oqaatigaa.

- Tamannali naammanngilaq innuttaasunullu suusupaginninnermik takutitsisuulluni, Aleqa Hammond oqarpoq.

- Jens B. Frederiksen saaffigingatsigu akisussaaffik Pilersuisumut ingerlateqqiinnarpaa. Pissutsit ima maanna ilungersunartigipput Naalakkersuisut siulittaasuata ajornartorsiut qaqilertariaqarlugu atugassarititallu aaqqillugit, Aleqa Hammond oqarpoq akisussaaffillu suli qulliunerusumut ingerlateqqillugu.