Kuupik aamma Villy isertuussipput

Suliaq oqaloqatigiissutigaarput. Taama paasiuminaatsigisumik nunanut allanut tunngasunut ministeri Villy Søvndal aamma Naalakkersuisut siulittaasuat ullup qeqqata siorna akisuteqarput. Ataatsimiinnermi eqqartorpaat CIAp nunatta silaannartaatigut timmisartuussisarsimaneragaanera. Illuatungeriillu erseqqissumik nalunaaruteqanngillat.

- Kalaallit isumaat uani pingaartinneqarput tamatumalu kingunera oqaloqatigiinnerit ingerlaqqissammata. Kisianni isumaqarpunga pitsaanerussasoq oqaloqatigiinnerput ingerlalluarnerussasoq kisitta oqaloqatigiikkutta, Villy Søvndal oqarpoq.

Ataatsimiinnermillu Naalakkersuisut siulittaasuat aamma isertuussivoq naak misissuinissamik kissaat ersarikkaluartoq.

- Danmarkimi naalakkersuisunngortitsinermut tunngaviusoq naalakkersuisullu tunngavigisaat paasisinnaavagut. Taakku soorunami qanoq iliuuseqarsinnaanitsinnik killiliipput, kisianni oqaatigisinnaavara tamakku pillugit oqaloqatigiinnerput ingerlalluartoq, Kuupik Kleist oqarpoq. Taassuma qanittukkut suliap naammassinissaa naatsorsuutigaa.

Villy Søvndalip siusinnerusukkut oqaatigitsiarnikuuaa, CIA-p tigusanik Nunarput qulaallugu timmisisartuussisarsimasinnaanera, inatsisinik atortitsinermut ministerip Morten Bødskovip Irakimi Afganistanimilu sorsunnerit pillugit misissuinissarsuarmut ilanngullugu misissortinnissaanut periarfissaqartoq.
Misissuinermullu tassunga ilumut ilanngunneqassanersoq, kia aalajangiiffigissaneraa, Villy Søvndalip ullumi oqaaseqarfigerusunngilaa.

Ataatsimiinnermi CIAp saniatigut oqallisigineqartut ilagaat issittumut iliuusissaq aamma Nunatta EU-mut isumaqatigiissutaa.