Kuupik aamma franskit ministeriat ataatsimeeqatigiipput
Naalakkersuisut siulittaasuat, Kuupik Kleist, nunanut nunasiaataasimasunut EU-mik niueqateqartunut, OLT-mik taagorneqartunut, aamma siulittaasuusoq, Frankrigimi nunanut OLT-mut ilaasunut ministerimik Victorin Lurel-imik ippassaq ataatsimeeqateqarpoq.
Nunat OLT-mut ilaasut EU-llu Ilulissani septembarip 25-annit 27-annut ataatsimeersuarnissaannut piareersarluni ataatsimeeqatigiittoqarpoq. Ataatsimeersuarnermi tassani aallartitat, ilaatigut ministerinik atorfilinnilu pingaarutilinnit 115-init peqataaffigineqarnissaa naatsorsuutigineqarpoq.
Nunatta nunanut OLT-mut ilaasunut siulittaasuutitaqarneranut atatillugu, Nunat EU-mut ilaasortaasut sisamat, tamarmik nunasiaateqarsimasut, naapinnissaat, Kuupik Kleistimut pingaaruteqarsimavoq. Nunat taakku tassaapput Tuluit Nunaat, Holland, Danmark aamma Frankrig.
Præsidentimut maajimi qinersinerup kingorna Frankrig nutaanik naalakkersuisoqalerpoq, nunanullu OLT-mut ilaasunut ministerimik Lurel-imik Kuupik Kleist siullermeerluni ataatsimeeqateqarpoq.
Frankrig nunanik nunasiaataasimasunik arfinilinnik suleqateqarpoq, taamaattumillu pingaarutilinnik soqutigisaqarluni. Tamatumalu peqatigisaanik nunanut OLT-mut ilaasunut siulittaasuutitaqarneq Nunatta tigummereerpagu, Frankrig siulittaasuutitaqalersussaavoq.
Parisimi ippassaq ataatsimeeqatigiinnermi nunat OLT-mut ilaasut EU-mik suleqateqarnerminni isumaqatigiissutinik nutarterinissaat oqaluuserisanut ilaavoq. Ilulissanilu ataatsimeersuarnermi oqaluuserisani tamatuma pingaarnersaanissaa naatsorsuutigineqarpoq.
Nunat OLT-mut ilaasut ilinniartitaanermut, ilisimatusarnermut aamma pinngortitamut ajoqutaanngitsumik ineriartortitsinissaannut tunngasut ippassaq oqaluuserisanut ilaapput.
