Kuummiut isertitakinnerpaaffiupput

Soorlu nunaqarfimmi isertitakinnerpaaffiusumi nunarfimmi isertitaqarnerpaaffiusumit, pingasoriaatip affaanik isertitakinnerupput.

Nunatsinni nunaqarfinni Kuummiut isertitakinnerpaaffiuvoq.

Kuummiormiu ataaseq agguaqatigiissillugu ukiumut 78.200 koruuninik isertitaqartarpoq, tassa qaammammut 6.500 koruunit missaannik.

Akerlianik Qassiarsummiut isertitaqarnerpaasarput, nunaqarfimmimi tassani agguaqatigiissillugu ataaseq ukiumut 78.200 koruuninik isertitaqartarpoq. Isertitallu taakku Kuummiormiunut naleqqiullugu pingasoriaatip affaanik amerlanerupput.

Nunaqarfiit pillugit nalunaarusiami ippassaq saqqummiunneqartumi, kisitsisit taama paasissutissiipput.

Isertitat nunaqarfiit akornanni kisimik assigiinngissuteqanngillat - tassami illoqarfiit nunaqarfiillu sanilliukkaanni assigiinngissut suli annerusarpoq.

Nuummi isertitat qaffasinnerpaapput, tassami Nuummiut agguaqatigiissillugu ukiumut millionip sisamararterutaanik isertitaqartarput.

Nunaqarfiilli uterfigeqqeriartigik.

Tassami nalunaarusiami paasinarsivoq, nunaqarfiit Kujataaniittut Tunumiittullu isertitakinnerpaasartut. Taakkunanimi nunaqarfinni amerlanerni isertitat ukiumut agguaqatigiissillugit 100.000 koruunit ataassimasarpaat.

Allaammi nunaqarfimmiut ilarpassui ukiumut 50.000 koruunit ataallugit isertitaqartarput - tassa qaammammut 4.000 koruunit sinnilaarlugit. Nunaqarfiit affaanni inuit tallimaagaangata ataaseq taama isertitakitsigisarpoq.

Nunaqarfinni amerlanngitsuni, nunaqarfimmiut pingasuugaangata, ataaseq qaammammut 4.000 koruuninik isertitaqartarpoq.