Kuummiuni angut 19-inik ukiulik ajunaartoq

Politiit imigassartorsimalluni ajutoortoqarsimassasoq ilimagaat
Angut umiatsiaaqqamit nakkaraluarluni qaqeqqittoq imigassartorsimallu angalasimasutut mianersuaalliorlunilu inummik toqutsisutut pasineqarallarpoq. Assi © : KNR
aggustip 02-at 2020 13:06
Nutserisoq Andreas Wille

Kalaallit Nunaanni Politiit Kuummiuni angummik 19-inik ukiulimmik umiatsiarluni ajutoortumik ujaasinertik unitsippaat.

Kuummiuni umiatsiamik ajutoortoqartoq Politiit ippassaq unnulersoq arfinermut qiteqquttoq nalunaarfigineqarput.

Inuusuttut pingasut, arnaq ataaseq angutillu marluk umiatsiaaqqamik nunaqarfiup ungasinngisaanut kangerlummukartillutik angutit marluk umiatsiamiit nakkarsimapput.

Angutip aappaa nammineerluni umiatsiaaqqamut qaqeqqissamavoq, aappaali nunaqqataasa politiillu ujaarigaluarpaat.

Angut taanna 19-inik ukioqarpoq, Kuummiuninngaanneersuullunilu. Taanna ajutoornermik kingorna politiit ipisimassagatippaat.

AAMMA ATUARUK Umiatsiaq Nuup Kangerluani ajutoormat arnaq inuusuttoq ajunaartoq

Ujaasineq ullumi unitsinneqarpoq, qanigisaasullu nalunaarfigineqarput.

Imigassartorsimalluni ajutoortoqarsimassasoq Politiit ilimagaat. Angut umiatsiaaqqamit nakkaraluarluni qaqeqqittoq imigassartorsimallu angalasimasutut mianersuaalliorlunilu inummik toqutsisutut pasineqarallarpoq.

Suliaq Politiinit suli misissorneqarmat, Politiit allanik oqaaseqarsinnaanngikkallarput.