Kuultisiorneq iluanaarnarpallaanngilaq

Piiaavik allanit aqunneqaleraluartoq, sulisut sulinerat piiaaviullu ingerlanera ingerlaannarallassapput.

Kommune Kujallermi borgmesterip, Jørgen Wæver Johansenip, Radioaviisimut uppernarsarpaa piiaavimmi Nalunami suli kuultisiortoqartoq, ingerlatseqatigiiffiullu kommunimut akileraarutinik pisussaaffinnillu allanik akiliisarnini suli ingerlakkaa.

Piiaavik suli ingerlagaluarluni siunissami qaninnermi akiliisinnaajunnaaratarsinnaavoq. Tamannalu, Jørgen Wæver Johansen naapertorlugu, kujataanut annertuumik kinguneqarsinnaassaaq.

- Piiaaviup inngferlaannarnissaa soorunami tamatta neriuutigaarput.

Piiaavik sulisorpassuaqarpoq, tassanngaanniillu akileraarutitigut isertitarineqartartut kommunimut pingaaruteqarluinnarput, Jørgen Wæver Johansen Qanoruumut oqarpoq.

Borgmesteri naapertorlugu sulisartut 60-it sinneqartut piiavimmi sulisuupput, taakkunannga amerlanersaat nunaqavissuullutik. Piiaavillu matussagaluarpat tamanna Kommune Kujallermut, suliffissaaleqinermik annertuumik eqqugaaqqareersumut kingunerluttussaassaaq.

- Kommunitsinni suliffinnik annaasaqarutta, akileraarutitigut isertitassaraluavut annaassavagut. Akileraarutitigullu isertitat ikilippata, innuttaasunik sullissineq ajornerulissaaq.

Taamaammat piiaaviup ingerlaannarnissaa neriuutigaarput, Jørgen Wæver Johansen oqarpoq.

Radioaviisip Nalunaq Gold Minep siuttorisaa Peter Connery oqaaseqartinniarlugu pissarsiariniaraluaramik iluatsissinnaasimanngilaa.